Pep Guardiola dhe Diego Simeone kanë folur pas takimit të mbrëmshëm gjysmëfinal të Champions League-s, nga ku u kualifikua për në finale Atletiko e Madridit.
Edhe pse i zhgënjyer nga eliminimi, edhe pse do i duhet ta lërë Bajernin pas pak javësh pa e fituar Champions League-n, Guardiola është treguar një xhentëllmen i vërtetë në fjalën e tij. Ai më së pari ka uruar kundërshtarët, Atletikon.
“Dua të uroj Atletikon. Eshtë një ekip shumë i fortë. Atletiko e meritoi finalen. Ata kanë zhvilluar një Champions League fantastike…, kanë bërë një punë të madhe.”
Spanjolli është kthyer të flasë dhe për Bajernin.
“Jam krenar për lojtarët e mi. Ishte një ndeshje e mirë për tifozët tanë, për të gjithë tifozët. Jam i lumtur, ndonëse i zhgënjyer për lojtarët e mi. Ne nuk e humbëm ndeshjen sepse Myler humbi një penallti. E bëmë thuajse gjithçka siç duhet. Kemi dhënë gjithçka.”
Në fund, Guardiola ka rezervuar edhe diçka për veten: “Kam qenë i lumtur këtu, dhe objektivi ishte arritja e finales së Champions League-s. Provuam çdo gjë. I takon shtypit të thotë se si qe këtu ekipi im. E kam bërë punën aq mirë sa munda, kam dhënë jetën për këtë klub. Jam krenar, është nder të punosh me këta lojtarë fantastikë.”
“Kjo Champions League është spektakolare, shumë e vështirë,” ka deklaruar Diego Simeone, strategu i Atletikos, që ashtu si dikur, kur luante në fushë, nuk arrin përsëri t’i përmbajë emocionet.
“Në pjesën e parë ne pamë një Bajern të jashtëzakonshëm, duke bërë presion e duke luajtur me shpejtësi, me intensitet. Ne kishim pak përgjigje ndaj situatave që ata krijuan. Në pjesën e dytë nuk ishte e njëjta ndeshje. Punuam mirë në kundërsulm, shënuam një gol…”
Diego Simeone e ka pranuar se ekipi i tij ishte pranë humbjes kur Bajernit iu dha një 11-metërsh, “Do të kishte qenë shumë e vështirë po të kishin shënuar.”
Siç ka pranuar se ato qenë momentet kyç të lojës, e se nëse do të kishte shënuar Torres po nga pika e 11-metërshit, për bavarezët thuajse do të kishte mbaruar gjithçka. “Po të shënonte Torres, atyre do t’u ishte bërë goxha dëm.”
Atletiko pret ta mësojë sonte emrin e skuadrës tjetër finaliste, kur Reali i Madridit dhe Mançester Siti të ndeshen në 20:45 në “Santiago Bernabeu.” Ndeshja e parë mes tyre ka përfunduar 0-0. /tesheshi.com/
