Afro 27 vjet pas rënies së sistemit komunist, Gramoz Ruçi, ndër emrat e bujshëm të fundit të atij sistemi, kjo për shkak të të qënit Ministër i Brendshëm në një moment politik delikat, rikthehet sërish si “rrogëtar shteti” për të mbajtur postin e kreut të Kuvendit, pra nr.3 të shtetit.
Për më shumë se dy dekada, Ruçi qëndroi vetëm në detyra të larta brenda PS-së, duke qenë një ndër ingranazhet kryesore të kësaj forcë politike, njohës i thellë i saj dhe menaxhues i spikatur situatash brendapartiake.
Edi Rama, po aq njohës i cilësive të Ruçit, kurrë nuk e llogariti për një “xhaketë të vjetër” që duhet hedhur tutje, por e mbajti krah vetes duke përfituar nga i gjithë potenciali i tij politik i nevojshëm.
Dhe në Top Story, Rama e konfirmoi faktin se Gramoz Ruçi do jetë kreu i ri i Kuvendit, që pason në këtë post Ilir Metën, njeriun që tashmë është President, me shumë dritëhije, ende pa hyrë në zyrat e kreut të shtetit.
Megjithatë, Rama tha se do ishte korrekt dhe instucional, në sjelljen e tij në ceremoninë e Metës-President.
“Presidenti i zgjedhur është i zgjedhur dhe tani vjen hapur nga radhët e opozitës, jo gjysmë i shfaqur dhe gjysmë jo. Këtu është çështje shteti dhe jo e personave dhe pavarësisht nga sjellja zhgënjyese e Presidentit të zgjedhur, respekti për institucionet duhet të vijë i pari dhe me shpresën që i pari që do të respektojë institucionin e Presidentit të jetë Presidenti i zgjedhur. S’e kam vënë asnjëherë në pikëpyetje këtë”, tha Rama.
Por nga ana tjetër, shefi i ekzekutivit i cilësoi si “çakej”, të gjitha ata kontigjente në administratë – duke aluduar për rrogëtarët e LSI-së – që sipas tij po shqyejnë copa shteti për aq sa u ka mbetur ende kohë deri në largimin nga administrata. /tesheshi.com/
