Policia e Kosovës në Mitrovicë ka identifikuar dhe arrestuar njërin nga dy personat e maskuar që ditë më parë kanë plaçkitur një dyqan në jug të Mitrovicës.
Zëdhënësi i policisë për rajonin e Mitrovicës Avni Zahiti, ka bërë me dije se në mbrëmjen e datës 17 mars 2015, në Mitrovicë ishte raportuar rasti i veprës penale ‘grabitje’, ku sipas viktimës, në dyqanin e tij që ndodhet në rrugën e “UÇK-së’’ dy persona të maskuar nën kërcënimin e armës kishin marrë një shumë të hollash prej 500 eurosh.
“Policia ka identifikuar dhe arrestuar njërin nga dy të dyshuarit. Ai është një mashkull 17 vjeçar, i përkatësisë etnike shqiptar, banor i Mitrovicës, shtetas i Republikës së Kosovës. I riu u arrestua më 19 maj 2015 në orët e vona të pasdites në Mitrovicë”,- ka thënë Zahiti.
I dyshuari u është nënshtruar procedurave intervistuese në prani të avokatit mbrojtës, ku më tej, me vendim të prokurorit publik, ndaj të dyshuarit është caktuar masa e ndalimit policor për 24 orë.
Rrjedha hetimore për veprën penale të ‘grabitjes’ do të vazhdojë edhe më tej drejt identifikimit dhe arrestimit edhe të personit tjetër të dyshuar. /tesheshi.com/
