Nga Bekim Laci
Pjesëmarrja e shqiptarëve në protestën të thirrur nga opozita maqedonase, është parë me dioptri të ndryshme që ka rezultuar me polemika të ashpra dhe debate në mesin e gazetarëve aktivistëve dhe opinionistëve, ku secila mbrohet me argumente “pro et contra”.
Shqiptarët dolën në protestë me inercion, në bazë të perceptimit personal të situatës, sepse asnjë subject politik ose shoqëror nuk ftoi për pjesmarje, përkundrazi ishte lëvizja Besa, që doli me deklaratë se nuk i përkrahë protestat e Zaevit pasi për ta, BDI-ja u kursye nga publikimet e bombave dhe kështu edhe një herë u tradhëtua populli shqiptar në Maqedoni, sepse hipotekat e kësaj partie mbeten në sirtarët e maqedonasve.
Nga ata që publikisht kundërshtuan pjesëmarrjen shqiptare në protestë, është edhe kryetari i Shoqatës së Gazetarëve të Maqedonisë, Naser Selmani, i cili në një prononcim për portalin tesheshi.com, shpreh bindjen se shumica e qytetarëve shqiptarë që dolën në protestën e opozitës maqedone, e kanë bërë këtë për të shprehur pakënaqësi nga qeverisja e Gruevskit dhe nga pakujdesi i partive shqiptare, por shton se shqiptarët janë manipuluar, sepse sipas tij, të njëjtit duhej të ftohen në protesta atje ku janë përfaqësuesit politik të shqiptarëve: “Dikush i mundësoi Zaevit të keqpërdor pakënaqësinë e shqiptarëve dhe frustracionin e tyre nga mospërfaqësimi i tyre, për pikë politike. Disa aktivistë dhe gazetarë, për interesa të paqarta, nxitën shqiptarët t’i bashkangjiten protestës, pa mbajtur llogari se mund të dëmtohet interesi i shqiptarëve. Ne e dimë se Ali Ahmeti dhe Menduh Thaçi janë të kapur dhe nuk duan të braktisin Gruevskin, por unë jam i bindur se nëse në Tetovë protestojnë 20 mijë shqiptarë, ata do jenë të detyruar të tërhiqen nga qeveria. Nëse shqiptarët rrënojnë Gruevskin, atëherë edhe meritat për ndryshimet demokratike në vend do t’u takojnë shqiptarëve”, thotë Selmani, i cili një ditë më herët kishte shkuar edhe më larg: “Pse kur nuk i dijnë gjërat turen sikur miza në mu..? Tash, ku janë ata të flasin?”.
Kjo deklaratë e tij, ngjalli reagime nga më të ashprat në mesin e përkrahesve të protestës.
Muhamed Zekiri, kryeredaktor i televizionit më të shikuar ndër shqiptarët e maqedonisë, Alsat, në argumentimin e qëndrimit të tij, thotë se shqiptarët nuk kanë përkrahur protestën e Zoran Zaevit, por dolën për të shprehur lirshëm paknaqësinë e tyre ndaj këtij pushteti totalitar: “Revoata e shqiptareve ndaj këtij pushteti është po aq e madhe, madje më e madhe se e Zaevit ndaj këtij pushteti të Gruevskit”, thotë Zekiri për portalin tesheshi.com, ndërsa shton se kaluar koha kur dikush ka mundur t`i tërheqë shqiptarët për hunde: “Ai që manipulon me ndjenjat e shqiptarëve, është pikërisht ky far kryetari i SHGM-së, Naser Selmani. Ajo që ndodhi të dielën,është Maqedonia që e dëshirojne qytetarët e këtij vendi, që bashkarisht ngrisin zërin kundër padrejtësive që u bëhen të gjithë qytetarëve pa dallim të përkatësisë etnike. Personat si kryetari SHGM-se me qëndrimet e tyre me ose pavetëdije, i kanë ndihmuar vetëm regjimit totalitar të Gruevskit”.
Aktivisti Petrit Saraqini, shprehet se Naseri është ai që fut huti sepse siç thotë, shqiptarët janë të papërfaqëuar dhe disa cikle zgjedhore me rradhë dalin të votojne vetëm 40% . Partitë shqiptare sipas tij, ose kane qenë servile ndaj pushtetit, ose janë marë me kalkulime, me teza të deplasuara dhe patriotizëm folklorik që i vendosin jashtë momentit aktual politik: “Mbi 90 % të shqiptarëve në të gjitha anketat janë kundër Gruevskit. Dhe, nëse shqiptarët dalin të protestojnë kundër Gruveskit, automatikisht qenkan me Zaevin? Këto simplifikime ndoshta janë adekuate për në çajtore, por jo për një diskurs të argumentuar publik”, tha Saraqini. /tesheshi.com/
