Qeveria e Kosovës i ka hapur rrugë krijimi të Gjykatës Speciale, duke miratuar amendamentet kushtetuese për këtë qëllim. Por qasja e saj ndaj kësaj gjykate të shumëpërfolur, e cila do ketë si qëllim gjykimi për krime lufte ndaj eksponentëve të ndryshëm të UÇK-së, ka qenë krejt tjetër, si nga ana e kryeministrit Isa Mustafa, e si nga ana e Ministrit të Jashtëm Hashim Thaçi.
Sipas tyre, do jetë pikërisht kjo gjykatë që do nxjerrë të vërtetat në shesh, pra faktin se UÇK-ja është udhëhequr vetëm nga parimet e lirisë në luftën e saj, pa u përfshirë në krime lufte. “E di se është vendim jo i lehtë. Është vendim i rëndë por është vendim i drejtë”, u shpreh Thaçi, duke shtuar: “Ne nuk kemi asgjë për të fshehur, prandaj edhe ballafaqimi me këtë problematikë është në interesin e të gjithëve”.
Të vështirë si vendim e ka konsideruar dhe shefi i qeverisë së Prishtinës, Isa Mustafa, i cili shpreh në mbrojtje të asaj lufte: “Ka qenë një luftë në të cilën është mbrojtur pragu i shtëpisë, janë mbrojtur familjet. Dhe dyshimet mbi individë assesi nuk guxojnë të trajtohen në këtë proces si dyshime mbi UÇK-në”, shtoi Mustafa.
Zëra të ndryshëm të shoqërisë kosovare, e konsiderojnë krijimi e Gjykatës Speciale për krime lufte, si një fyerje për gjithë Kosovën, vuajtjet dhe luftën e saj për liri. Sipas gjykimit të përgjithshëm, kjo lloj gjykatë është një atentat ndaj UÇK-së. Por siç duket, politika vendimarrëse e Prishtinës është vënë nën presion ndërkombëtar për krijimin e gjykatës në fjalë, çka u duk qartë dhe në fjalët e Mustafës, Thaçit, por dhe presidentes Jahjaga, e cila e përshëndeti vendimin për amendime kushtetuese në funksion të krijimit të saj. /tesheshi.com/
