Nga Blerim Kore
Në 10-vjetorin e përfshirjes së Gjirokastrës në UNESCO, banesa e Babametove është simboli i monumenteve të kulturës e cila falë ndërhyrjes së faktorëve të ndryshëm i shpëtoi rrënimit duke u shndruar në një model të zhvillimit të turizmit në Gjirokastër.
Banesa mirëpret turistët
Në këtë sezon turistik kjo banesë është kthyer në një shembull të rijetëzimit të monumenteve të kulturës dhe vendosjes së tyre në shërbim të zhvillimit të turizmit. Tashmë kjo shtëpi shërben si një qendër akomodimi për vizitorët e ndryshëm, ndërkohë që në mjediset e saj zhvillohen edhe aktivitete të larmishme si trajnime, ekspozita artistike, etj. Në këtë sezon turistik, banesa e gurtë e Babametove ka çelur dyert për turistët nga vende të ndryshme të botës, ndërkohë që nuk mungojnë as specialistët e trashëgimisë kulturore, të cilët janë të interesuar për mënyrën e ndërtimit të kësaj shtëpia. Pjesë e kësaj gjallërie në mjediset e banesës së gurtë janë edhe aktivitetet e ndryshme të inicuara nga shoqëria civile, organizimet kulturore, etj. Administratorët aktualë të kësaj shtëpie, janë përfaqsues të ‘Fondacionit Gjirokastra’ të cilët na marrëveshje me pronarët e banesës menaxhojnë godinën e gurtë. “Babametot tashmë është një model cilësor i vendosjes së monumenteve të kulturës në shërbim të komunitetit dhe zhvillimit të turizmit”, shprehet Edvin Lamçe, përfaqsues i ‘Fondacionit Gjirokastra’. “Ky sezon turistik ka tërhequr me dhjetra vizitorë në këtë shtëpi madje mes tyre ka edhe nga ata që rikthehen sërish për të disatën herë”, thotë Lamçe.
Vizitorët i bashkojnë vlerat e shtëpisë
Vizitorët nga vende të ndryshme të botës të cilët akomodohen ne banesën e Bametove, apo janë pjesë e aktiviteteve dhe organizimeve të ndryshme që kryhen në të, shprehin vlerësimet për historinë dhe arkitekturën e kësaj shtëpie. Dikush prej tyre vjen nga Shtetet e Bashkuara të Amerikës, një tjetër është kërcimtare e flamengos braziliane, një tjeteër studiues i monumenteve të kulturës nga Britania e Madhe, megjithatë ata i bashkon i njëjti vlerësim për shtëpinë e gurtë.
“Kam disa ditë që qëndroj në shtëpinë e Babametove pasi vizitova Gjirokastrën në këtë sezon veror. Mendoj se është një godinë e veçantë dhe me vlera, mbreslënëse janë jo vetëm muret dhe harqet e gurta por edhe mjediset e bnendshme të shtëpisë të punuara në dru të skalitur. Kam vizituar disa vende të ndryshme të botës por mënyra e ndëritmit të kësaj shtëpie është e vecantë. Mendoj të rikthehem sërish në këtë shtëpi pushimet e ardhshme”, thotë Dejvi, një i ri nga SHBA-ja.
Bashkëshortët Maria dhe Karl janë muzikantë të flamengos braziliane. Prej disa ditësh ata janë akomoduar në banesën e Babametove ndërkohë që mes të tjerash shprehin impresionet për këtë godinë të gurtë.
“Vij nga Kolumbia ndërkohë që profesioni im është muzikante e flamengos. Po kaloj disa ditë pushimesh në vendin tuaj ndërkohë që së bashku me bashkëshortin jemi akomoduar në mjediset e banesës së Babametove. Është me të vërtetë një ndërtesë origjinale. Megjithëse arkitektura e saj nuk përngjan me ndërtimet karakteristike në vendin tim sërish ka nisur të më tërheqë, sidomos bardhësia e fasadës. Ndërkohë që edhe portat dhe dritaret prej druri janë pjesë e vlerave të shtëpisë në tërësi. Megjithëse nuk jam profesioniste e monumenteve të kulturës sërish mendoj se kjo banesë ka shumë vlera”, thotë Maria.
Gjatë bashkëbisedimit në avllinë e gurtë të Babametove, artisti Karl shton : “Mendoj se kjo shtëpi ka më shumë vlera dhe ndihem i kënaqur për të qëndruar në Gjirokastër. Nuk përzgjodha një ndërtim modern por u akomodova në këtë shtëpi karakteristike. Mjediset e brendshme të shtëpisë janë fantastike, ndërkohë dhe të punuara me dru ato krijojnë një ambjent të veçantë. Mendoj se ata që e kanë ndërtuar kanë qenë njerëz me shije pasi i kanë dhënë një arkitekturë të vecantë çka bën që në këto ditë kjo banesë të jëtë plot gjallëri”.
Mbresa dhe emocione nga vizitorët
Ndërkohë edhe administratorët e kësaj shtëpie veçojnë mbresat që kanë nga puna e përditshme me vizitorët. Mes të tjerash ata të tregojnë fotografi, copëza bisedash me turistët e impresionuar nga shtëpia të cilat në disa raste i shoqërojnë me buzëqeshje dhe humor. Administratorja Nevila Llavdaniti thotë se një pjesë e turistëve preferojnë të flenë në dyshmenë e punuar me dru. “Disa turistë dëshirojnë të flejnë në dyshemenë me dru të odasë së madhe të shtëpisë, një prej mjediseve më të vecanta të banesës”, thotë Nevila.
Krahas banesës së Babametove aktualisht në Gjirokastër janë disa banesa karakteristike të cilat shërbejnë si qendra turistike ndërkohë që të tjera janë në proces restaurimi me perspektivën e mikpritjes për vizitorët vendas dhe të huaj. /tesheshi.com/
