Ndërkohë që zyrtarisht është lajmëruar fundi i përleshjeve në Kumanovë të Maqedonisë dhe është shpallur gjendja e jashtëzakonshme, duket se diçka më ndryshe është situata në këtë vend, krahasuar me dy ditë më parë.
Mirëpo, të shumta kanë qenë edhe reagimet e zyrtarëve dhe ato të diplomacisë së vendeve fqinje përfshirë edhe Shqipërinë e Kosovën. Nuk kanë munguar as raportimet e fundit të përleshjes së përgjakshme nga një pjesë e mirë e mediave ndërkombëtare, të cilat mbajnë të informuar anekënd botës qytetarët, në lidhje me situatën e ‘nxehtë’ në rajonin e Ballkanit.
BBC raporton në seksionin e Europës fundin e betejës në Kumanovë me titullin “Macedonia blames Kosovans for deadly Kumanovo clashes” (Maqedonia fajëson kosovarët për vdekjet në Kumanovë pas përplasjes).
Al Jazeera prej dy ditësh ka raportuar gjithçka që ka ndodhur në vend, me foto dhe video, ndërsa sot gjithçka e përmbledh në shkrimin me titull “Deaths as Macedonia police clash with gunmen” (Vdekje pas përplasjes së policisë në Maqedoni me persona të armatosur).
Pas lajmërimit zyrtar të bërë nga ana e zëdhënësit të ministrisë së Brendshme të Maqedonisë, i menjëhershëm ka qenë edhe lajmi i Reuters, i cili nis me titullin “Deadly gun battle deepens Macedonian crisis; 22 killed” (Beteja më armë pason krizën e thellë në Maqedoni, 22 të vrarë) dhe më tej vijohet me një analizë të plotë e të gjerë në lidhje me ngjarjet në vend.
Nuk ka ngelur pa raportuar as Serbia për fundin e përleshjes së përgjakur dy ditore në Kumanovë, ndërsa një nga mediat më të rëndësishme online të këtij shteti, ‘B92.net’, ndërsa publikon qëndrimin zyrtar të Shkupit përmbledh ngjarjen nën titullin “Border zone reinforced as 6 police die in Macedonia clashes” (Përforcohet kufiri pas vdekjes së 6 policëve në përplasjet në Maqedoni).
Mediat italiane nuk kanë ngelur pas në raportim dhe një ndër më të ndjekurat online Ansa.it, një agjenci prestigjioze lajmesh në shtetin përtej detit vijon pasqyrimin e ngjarjes nën shkrimin me titull “Macedonia: proseguono scontri a Kumanovo” (Maqedoni: vijojnë përleshjet në Kumanovë).
Gjithashtu, edhe mediat shqiptare e ato të Kosovës e kanë pasur si lajm kryesor dhe njëkohësisht kanë vijuar me raportimet minutë pas minute, nëpërmjet korrespodentëve në terren.
Shpresojmë që e gjithë kjo ngjarje me pasoja tepër të rënda për popullin e Maqedonisë dhe shqiptarët në Maqedoni të jetë një mësim i mirë për politikën dhe të jenë të fundit. Ngjarje të tilla urojmë të mos përsëriten, se përveç se shkaktojnë pasoja të pashërueshme në vend, njëkohësisht shkatërrojnë imazhin e Maqedonisë tek ndërkombëtarët dhe jo vetëm./tesheshi.com/
