Një kamp për persona të zhvendosur në shkretëtirën siriane, ku njerëzit jetonin në kushte çnjerëzore, ka mbyllur portat e tij pasi familjet e fundit u larguan për në vendet e tyre të origjinës, njoftuan autoritetet siriane.
Kampi Rukban, i vendosur pranë kufijve jordanezë dhe irakianë, u krijua në vitin 2014, në kulmin e luftës në Siri, në një zonë të kontrolluar nga koalicioni ndërkombëtar i udhëhequr nga SHBA-të.
Për shkak të vendndodhjes së tij të largët, Rukban për vite me radhë konsiderohej një nga kampet e refugjatëve më të ndyra dhe të lëna pas dore në Siri.
Rreth 8,000 njerëz jetonin ende atje para rënies së presidentit Bashar al-Assad në dhjetor 2024, duke mbijetuar me ushqim dhe mallra bazë të kontrabanduara me çmime të larta.
“Me çmontimin e kampit Rukban dhe kthimin e të zhvendosurve (në vendet e tyre), një kapitull tragjik dhe i dhimbshëm është mbyllur për zhvendosjet e krijuara nga makina e luftës e ish-regjimit“, tha ministri sirian i Informacionit Hamza al-Mustafa në një postim në platformën X.
“Rukban nuk ishte vetëm një kamp, ishte trekëndëshi i vdekjes, dëshmitar i brutalitetit të rrethimit dhe urisë, ku regjimi i braktisi njerëzit në fatin e tyre të dhimbshëm në shkretëtirë”, shtoi ai.
Kampi dikur strehonte deri në 100,000 njerëz. Me kalimin e kohës, personat e zhvendosur kanë ikur, veçanërisht pasi Jordania mbylli kufijtë e saj dhe ndaloi shpërndarjen e rregullt të ndihmës humanitare në vitin 2016.
Ministri sirian i Situatave të Emergjencës dhe Fatkeqësive, Raed al-Saleh, tha se shpresonte që kampe të tjera për personat e zhvendosur në vend të mund të mbylleshin gjithashtu në mënyrë që banorët e tyre të mund të ktheheshin në shtëpitë e tyre.
Task Forca Siriane e Emergjencës me bazë në SHBA tha të premten se kampi tani ishte “zyrtarisht i mbyllur dhe i zbrazët”.
Lufta në Siri shpërtheu pas shtypjes së përgjakshme nga Damasku të protestave pro-demokraci në vitin 2011. Ajo ka lënë më shumë se gjysmë milioni të vdekur, miliona të zhvendosur dhe infrastrukturë të shkatërruar.
Sipas Organizatës Ndërkombëtare për Migracionin (IOM), 1.87 milion njerëz të zhvendosur brenda Sirisë ose jashtë vendit janë kthyer në vendet e tyre të origjinës që nga dhjetori i kaluar. /tesheshi.com/
