Të paktën 11 persona kanë vdekur në të shtënat masive më vdekjeprurëse në Austri në qytetin e dytë më të madh të vendit.
Një person i armatosur hapi zjarr në një shkollë të mesme në Graz, qytetin e dytë më të populluar të Austrisë, të martën. Të paktën 11 persona, përfshirë të dyshuarin, u vranë, sipas kryetarit të bashkisë dhe policisë së qytetit.
Sulmi i së martës ishte ndër të shtënat masive më vdekjeprurëse në vendin e Evropës Qendrore.
Ja çfarë dimë deri më tani:
Çfarë ndodhi dhe ku?
Të shtënat ndodhën në mëngjes në shkollën e mesme BORG Dreierschutzengasse në Graz, kryeqytetin e shtetit jugor austriak të Styria-s.
Policia u thirr në shkollë rreth orës 10 të mëngjesit pasi u dëgjuan të shtëna atje.
Grazi ndodhet rreth 200 km në jugperëndim të Vjenës dhe është shtëpia e monumenteve historike si Uhrturm, ose Kulla e Sahatit, në kodrën Schlossberg. Qyteti me më shumë se 300,000 banorë është i dyti më i populluar në vend pas Vjenës.
I njohur për universitetet dhe kolegjet e tij, Grazi është një qytet demografikisht i larmishëm. Shtetasit e huaj përbëjnë një të katërtën e popullsisë, me kroatët, rumunët, gjermanët dhe boshnjakët katër grupet më të mëdha, sipas qeverisë së qytetit.
Çfarë dimë për viktimat?
Të paktën 11 persona u vranë, citoi agjencia austriake e lajmeve APA kryetarin e bashkisë së Grazit, Elke Kahr.
Policia dhe Kahr konfirmuan në mënyrë të pavarur se dhe autori i masakrës ishte midis të vdekurve.
Midis 11 viktimave është një vajzë nga Vitia, Lea Bajrami, 15 vjeçe.
Policia tha se të paktën 30 persona u plagosën.
Çfarë dimë për sulmuesin?
Mediat austriake e identifikuan të dyshuarin si një ish-nxënës 21-vjeçar.
Autori dyshohet se mbante një pistoletë dhe një pushkë gjahu dhe hapi zjarr ndaj nxënësve në dy klasa, njëra prej të cilave dikur ishte klasa e tij.
APA dhe Kronen Zeitung, gazeta më e madhe e Austrisë, raportuan veçmas se i dyshuari u gjet i vdekur në një tualet.
Policia lokale shkroi në një postim në X se po vepron me supozimin se autori i krimit veproi i vetëm.
Çfarë thonë autoritetet?
Kancelari austriak Christian Stocker e përshkroi sulmin si një “tragjedi kombëtare” në një deklaratë të botuar në X.
“Vrasjet në shkollën në Graz është një tragjedi kombëtare që ka tronditur thellësisht të gjithë vendin tonë“, shkroi ai.
Stocker njoftoi të martën se Austria do të mbajë tre ditë zie. /tesheshi.com/
