Nga Donat Maloku
Me 75 vota pro, 7 kundër dhe dy abstenime, Kuvendi i Kosovës të premten ka votuar kundër amandamentit 24 që do t’i hapte rrugë themelimit të Dhomave të Specializuara.
Analistët thonë se nëse institucionet e Kosovës nuk reagojnë shpejt rreth kësaj çështje, atëherë Këshilli i Sigurimit të OKB-së do të formojë Gjykatën Speciale. Ata mendojnë se presioni ndaj shtetit të Kosovës do të shtohet në ditët në vijim që kjo Gjykatë të formohet. Sipas analistëve, nuk përjashtohet sponsorimi i ngutshëm i Rusisë në Këshillin e Sigurimit të OKB-së të të njëjtit Projektligj në fjalë, madje, në version pak ca më problematik nga i tanishmi.
Analisti politik, Fatmir Sheholli, në një prononcim për portalin “Te Sheshi”, ka thënë se për Republikën e Kosovës mosvotimi i Speciales, do të thotë se shteti ynë edhe shumë kohë do të ballafaqohet me drejtësinë ndërkombëtare.
“Kosovën e presin shumë sfida në këtë aspekt. Në vendet demokratike nëse një çështje me interes kaq të madh nuk do të kishte kaluar, atëherë është e logjikshme të kërkohet arsyeja pse ka ndodhur. Kemi parë që shtatë deputetë të PDK-së kanë votuar kundër kurse dy janë përmbajtur. Do të thotë që kjo çështje duhet të bisedohet në mes partnerëve të koalicionit dhe të japin përgjigjeje para opinionit të gjërë kosovar se pse ka ndodh kjo. Do të ishte mirë që shumë shpejt qeveria e Kosovës të ulet me opozitën e të flas për modalitetet e mundshme të formimit të Gjykatës Speciale dhe të gjindet konsensus nacional për këtë çështje. Nëse institucionet e Kosovës nuk reagojnë shpejt rreth kësaj çështjeje, atëherë Këshilli i Sigurimit të OKB-së do të formojë Gjykatën Speciale. Por besoj që institucionet e Kosovës do të gjejnë forcë dhe ujdi që ta bëjnë vet e mos të lejojnë armiqët e pavarësisë së Kosovës të na sjellin një Tribunal për Kosovën”, ka deklaruar Sheholli.
Njohësi i kushtetueshmërisë në vend, Riza Smaka, thotë se në parim, një çështje e refuzuar një herë, në këtë rast, refuzimi nga Kuvendi i Republikës se Kosovës i Amendamentit për të krijuar naze kushtetuese për aprovimin e Propozim Ligjit për Dhomat Gjyqësore të Specializuara dhe Zyret Prokuroriale të Specializuara, konsiderohet çështje e vendosur “Res Iudiciata” dhe si e tillë nuk do të lejohej për t’u ripropozuar, sëpaku jo para se të modifikohej esencialisht. Sipas Smakës, një gjë e tillë nuk mund të pritet, sepse atë akt ligjor e ka përcaktuar komponenta ndërkombëtare në një konsensus të tipit ‘Take It Or Leave It – mere ose lëre!’.
“Me bazë mund të pritet sponsorimi i ngutshëm i Rusisë në Këshillin e Sigurimit të OKB-së të të njëjtit Projektligj në fjalë, madje, në version pak ca më problematik nga i tanishmi, i cili, poashtu është irritues, provokues dhe papërfillës për rendin juridik, Kushtetutën dhe Kuvendin e Republikës së Kosovës. Nëse në ndërkohë nuk hartohet dhe miratohet nga Kuvendi i Kosovës një draft pak ca me ndryshime nga ky në fjalë, në një procedurë të caktuar mund të pritet që, Këshilli i Sigurimit të OKB-së të miratojë Projektligjin për Dhomat Gjyqësore e Prokurorial e të Specializuara për Kosovën në versionin përafërsisht të njëjtë me këtë që sot nuk është adoptuar sot”, ka deklaruar Smaka, për portalin “Te Sheshi”.
Analisti, Blerim Burjani, thotë se priten diskutime në shtetet e KUINT-it për të gjetur një solucion tjetër në këtë drejtim . “Një nga modelet tjera nund të jetë themelimi i Dhomave Speciale në kuadër të sistemit gjyqësor të Kosovës, ose OKB-ja të themeloj, kështu pritet të ndodh ditët në vijim. Presioni do të shtohet për shtetin e Kosovës”, ka deklaruar Burjani, për portalin “Te Sheshi”.
Faik Krasniqi, poashtu analist nga Prishtina, thotë se askund nuk ceket që Gjykata Speciale do t’i trajtojë krimet ekonomike, vrasjet politike dhe ato civile.
“Këta 120 deputetë po të ishin burra e burrnesha, që në fillim do të kërkonin nga OKB-ja që Gjykatën Speciale do ta votonin me kusht, nëse kjo Gjykatë do të mirrej edhe me krime ekonomike, vrasje politike, krime civile, krime lufte dhe krime të ndryshme, pa dallim etnie, e tek atëherë do të pastrohej skena politike në Kosovë. Por me (mos)votimin e kësaj Gjykate në këtë mënyrë, siç thashë më lartë, do të shkonin në burg këta me qindra shokë të tyre për krimet e rënda që ia shkaktuan Kosovës dhe popullit të saj, prandaj përveç gjykimit për krime lufte, nuk i futën edhe krimet e tjera, kështu që mos të na sheshin demagogji as këta që votuan pro e as ata që votuan kundër, sepse për mosthemelimin e Gjykatës Speciale është fajtore e gjithë klasa politike e tejkriminalizuar.
Kjo Gjykatë Speciale ka qenë treni i fundit i shtetit të Kosovës, nëse do të votohej për trajtimin e të gjitha krimeve, dhe do të shpëtonim njëherë e mirë nga këta kriminelë të politikës dhe parapolitikës, e që janë me qindra, të cilët janë fajtorë për kapjen e shtetit, të drejtësisë dhe për shkatërrimin e ekonomisë dhe shtetit të Kosovës. Jo, tash Gjykata Speciale do të themelohet nga OKB-ja, dhe kjo për fajin e kësaj klase kriminale e të korruptuar, që tash e 16 vite e kanë kapur shtetin për fyt dhe Kosovën e kanë shndërruar në pronë të tyre private!”, ka deklaruar Krasniqi për portalin “Te Sheshi”.
Analisti Nexhmedin Spahiu, përmes një shkrimi në Facebook thotë se pas dështimit të votimit për Gjykatën Speciale, kryeministri Isa Mustafa duhet të shkojë. “Kjo është e vetmja rrugë që Kosova të mos shkojë drejt Këshillit të Sigurimit të OKB-së dhe vendimit fatal për fatin e saj. Kosova duhet të krijojë qeveri gjithëpërfshirëse me të gjitha partitë parlamentare të saj dhe ta provojë edhe njëherë votimin e Gjykatës Speciale në Parlament”, ka shkruar Spahiu./tesheshi.com/
