Blendi Gashi
Qeveria e Republikës së Kosovës ka miratuar Ligjin e ri për Shërbimin e Jashtëm të Kosovës. Ky projektligj, parashihet të rregullon funksionimin e Shërbimit të Jashtëm të Republikës së Kosovës, i cili përfshinë Ministrinë e Punëve të Jashtme, misionet diplomatike, postet konsullore dhe nëpunësit e Shërbimit të Jashtëm të Republikës së Kosovës, si dhe çështjet tjera që ndërlidhen me funksionimin dhe veprimtarinë e Shërbimit të Jashtëm të Republikës së Kosovës.
Qeveria mendon se përmes këtij ligji do të forcohen kriteret për pranimin në shërbimin e jashtëm dhe kështu do të forcohet edhe diplomacia kosovare.
Por, analistët kanë pikëpmaje të ndryshme sa i përket miratimit të ligjit të ri. Shprehet skepticizëm se mund të reformohet shërbimi diplomatik duke thënë se Qeveria vetëm sa do të rehatojë edhe më shumë militantët partiak në pozita diplomatike, por edhe shpresohet se do të punësohen njerëz profesional në misionet diplomatike.
Kurse, drejtues të partive opozitare thonë se ndryshimi i ligjit nuk pritet të sjell reformim të shërbimit të jashtëm.
Ministri i Jashtëm, Hashim Thaçi, ka thënë se ligji bën rregullim më të qartë dhe gjithëpërfshirës të pozitës së personelit të shërbimit të jashtëm dhe qartëson dallimin mes diplomatëve të karrierës dhe shërbyesve civilë të cilët janë të punësuar në MPJ.
“Me anë të tij forcohen kriteret për pranimin në shërbimin e jashtëm, ndërsa sistemi i gradave dhe i procesit të gradimit të diplomatëve të karrierës është bërë më i qartë dhe përmes tij do të përmirësohet edhe trajtimi i diplomatëve të karrierës dhe të anëtarëve të familjeve të tyre”, ka thënë Thaçi.
Kryetari i Këshillit Kombëtar të NISMA për Kosovën, Jakup Krasniqi në një prononcim për portalin ‘Te Sheshi’, ka thënë se për të zbatuar ligjet duhet pasur vullnet, i cili mungon ende tek ne.
“Për të dhënë një mendim të qëndrueshëm duhet parë ligjin sesa vërtetë synon reformimin edhe pse edhe ndryshimi i ligjit mund të mos jetë reformim. Për reforma si edhe zbatim të ligjit duhet pasur vullnet?! Tek ne ende mungon ky vullnet”, ka deklaruar Krasniqi.
Analisti politik, Blerim Burjani, ka thënë për portalin “Te sheshi” se nuk beson në reformimin e shërbimit diplomatik të Kosovës, pasi thotë se nuk ka transparencë fare në dërgim të këtyre njerëzve që janë partiak.
“Ky shërbim funksionon me listë partiake kush duhet ku të shkoj dhe në cilin shtet ambassador. Ky shërbim është i PDK-së dhe si i tillë duhet të reformohet dhe te vijn njerëz tjerë, dhe plotësisht të departizohet dhe të hapet konkurs publik nëse dëshirohet që Kosova të ketë një shërbim profesional e jo partiak. Ky shërbim nuk ka asgjë të bëj me diplomacinë e mirëfilltë të aftë të përgatitur për t’i shërbyer qytetarëve e jo liderit politik. Ky shërbim përbëhet prej përkthyesve, dajallarëve, miqëve të PDK-së dhe disa njerëzve të LDK-së. Ky ligj mund të legalizoj punësimin e njerëzve në shërbim dhe rehatim financiar të militantëve partiak”, ka deklaruar Burjani.
Njohësi i rrethanve politike në vend, Islam Krasniqi ka deklaruar për portalin “Te Sheshi”, se çdo herë Qeveria në fillim të mandatit të punës ka bërë reformimin e personelit diplomatik, mirëpo asnjëherë nuk i ka zgjedhur njërzit e duhur.
Ai shpreson se me miratimin e ligjit të ri për shërbimet e jashtme që të ketë njerëz të ndershëm dhe punëtor, që do ta kryejnë punën me përpikri dhe ta përfaqësojnë vendin me dinjitet.
“E mira e këtij ligjit është së definohet statusi tyre se a janë shërbyes civil apo të karrierës, por mos të harrojmë të cekim se një e veçant e këtij ligji është edhe pozita e Inspektorit diplomatik, detyrë e të cilit është që të fuqizojë mbarëvajtjen dhe menaxhimin efikas të misioneve diplomatike dhe konsullore dhe në këtë mënyrë të rritet llogaridhënia brenda shërbimit të jashtëm të Kosovës gjë që edhe punët do të kryhen me sukses dhe vendin tonë do të ngrisin një nivel më të lartë dhe do të rritë edhe moralin”, ka deklaruar Krasniqi.
Ndryshe, portali ynë ka kontaktuar edhe me përfaqësues të dy partive tjera opzitare Lëvizjes “Vetëvendosje” dhe Aleancës për Ardhmërinë e Kosovës por ata nuk janë përgjigjur në pyetjet tona.
(tesheshi.com)
