Kryetari i partisë Demokratike, Lulzim Basha kërkoi dorëheqjen e kreut të Kuvendit, Ilir Meta për një aferë korrupsioni të raportuar nga BIRN.
Basha e akuzon Metën se ka marrë ryshfet nga një person i arrestuar më parë për korrupsion, duke deklaruar edhe se firma e mikut të kreut të Kuvendit ka përfituar miliona euro. Faktet u bënë të ditura në një artikull investigativ e menjëherë pas botimit, Basha ka dalë në një konferencë shtypi për të denoncuar rastin.
Sipas Bashës, zbulohet se kreu i Kuvendit ka marrë rryfshfet nga një biznesmen, i cili kishte krijuar një kompani për mbledhjen e borxheve të CEZ.
“Ilir Meta ia ka dalë mbanë t’i shpëtojë drejtësisë herët e kaluara, por këtë herë, Partia Demokratike dhe opozita është e vendosur që të kërkojë dorëheqjen e kreut të Kuvendit, në mënyrë që t’u hapë rrugë hetimeve të paanshme”, tha Basha, i cili paralajmëroi gjithashtu se “nëse Rama-Meta do të tentojnë manipulimin, do të përballen me qytetarët”.
Basha ka kërkuar nisjen e hetimeve për të zbuluar skemën që e cilësoi, korrupsionin më të madh në vend. /tesheshi.com/
