Shpallja me bujë i aksionit “Forca e Ligjit”, në një ceremoni ku vetë ambasadori amerikan Donald Lu deklaroi se ka nisur stina e “peshqve të mëdhenj”, krijoi një pritshmëri të madhe në publik.
Madje jo vetëm në opinion, por edhe në qarqet ligjzbatuese të shtetit. Forcat Speciale të Policisë së Shtetit janë prej kohësh në gjendje “kazerme”, për t’ju përgjigjur urdhërave për ekzekutimin e kapjeve dhe arrestimeve.
Megjithatë nisja e këtij aksioni nuk ka pasur bujën e ceremonisë shpallëse. Në Fier dhe në Shkodër, siç u bë e ditur nga policia u zhvilluan dy aksione pjesë e “Forca e Ligjit”. Rezultati i këtyre dy operacioneve ishte “mbetja në rrjetë” e disa “cironkave”. Gjithsesi, në opinion u diskutua fillimisht se “gjuetia” do të jetë gjithëpërfshirëse dhe do të mbledhë pa zgjedhur.
Por pikëpyetjet mbi rezultatet reale të “Forca e Ligjit” u hodhën pikërisht kur krerët e Policisë dhe Ministrisë së Brendshme nisën t’i potenconin këto aksione si “të fuqishme”.
Madje ministri i Brendshëm Fatmir Xhafa, shkroi personalisht në llogarinë e tij të sapo hapur në Twitter për aksionin e Shkodrës, të cilin e quajti si një nga më kryesorët, duke theksuar se u kap një nga grupet më të fuqishme në zonë.
Po ç’ishte aksioni i Shkodrës?
Bëhët fjalë për operacionin “Balerina”, ku u kap Reinard Tota, një 50-vjeçar që merrej me shfrytëzim prostitucioni, të cilit iu sekuestruan edhe pasuritë, një bar-restorant-hotel, makinat, para cash dhe pajisje elektronike, si dhe një pistoletë.
Grupi në fjalë ishte vite që ushtronte aktivitetin në Shkodër në sytë e të gjithëve, madje Ferderiku që quhej edhe Reinard, i nxirrte “vajzat e tij” në publik, jo vetëm në faqet e rrjeteve sociale por edhe në aktivitete publike siç ishte edhe “çadra e lirisë” e opozitës disa muaj më parë.
Normalisht ai ushtronte një aktivitet antiligjor dhe të dënueshëm, por kapja e tij gjithsesi ngjan me parodi nëse ai konsiderohet si një “peshk i madh”.
Kjo pasi edhe sikur i arrestuari të kishte lidhje me struktura të zbatimit të ligjit, që dukshëm ka pasur, sepse ndryshe nuk mund të vepronte lirshëm, ai përbën një rast tragjikomik më shumë se të fuqishëm për të justifikuar përfshirjen e tij në “Forca e Ligjit”.
Në Shkodër, si edhe në vende të tjera, i dijnë me emër dhe mbiemër “të fortët” e lidhur me struktura e autoritete që i kanë vënë emrin “të paprekshëm”.
Bëhet fjalë për njerëz mbi të cilët rëndojnë vendime penale dhe që nuk ekzekutohen, madje janë të integruar në jetën normale të qytetit, duke vënë gjoba dhe ushtruar biznese.
Nëse do të kapeshin këta persona, atëherë opinioni do të thoshtë vërtetë se ka nisur “Forca e Ligjit”, ndryshe gjithçka do të ngjante e pakta si një sarkazmë therrëse, një ironi gati-gati, tallëse. /tesheshi.com/
