Partitë Popullore Europiane mbështesin Shqipërinë drejt Bashkimit Europian, si dhe çeljen e negociatave për anëtarësim. Kështu u shpreh raportuesi për Shqipërinë në Parlamentin Europian, Knut Fleckenstein gjatë takimit të zhvilluar me kryetarin e Kuvendit, Gramoz Ruçi.
“Bashkimi Evropian kishte dy kushte thelbësore për Shqipërinë. E para, ishin zgjedhjet, të cilat në vlerësimin tonë ishin më të mirat që ju keni zhvilluar në gjithë këto vite.
E dyta, ishte avancimi me reformat e rëndësishme dhe të domosdoshme kryesisht në atë të drejtësisë, për të cilat ne kemi një opinion dhe vlerësim shumë pozitiv. Shqipërisë i duhej të punonte fort në këtë drejtim.
Nuk ka dyshim që kjo po bëhet dhe ne do të bëjmë çmos që KE të çelë negociatat me vendin tuaj. Për këto arsye, unë jam i bindur se Komisioni do të vendosë për ‘PO’ në qershor të vitit të ardhshëm”, tha Fleckenstein.
Duke siguruar për vendosmërinë e Kuvendit të Shqipërisë për vijimin e procesit integrues, Ruçi u shpreh se Shqipëria po vijon punën për implementimin e reformës në drejtësi dhe veçanërisht të ligjit të Vetting-ut.
“Rezultati i zgjedhjeve të qershorit ishte një mandat i qartë për reformat evropianizuese. Ne kemi filluar zbatimin e reformës në drejtësi, që u miratua me konsensus ndërpartiak në korrik 2016 dhe që do të forcojë ndjeshëm luftën kundër krimit të organizuar dhe korrupsionit. Kuvendi i Shqipërisë pret çeljen e negociatave më Bashkimin Evropian për vijimin e reformave të mëtejshme legjislative”, tha Ruçi.
Nga ana tjetër kreu i Kuvendit është shprehur se do vazhdojë të bashkëpunojë ngushtë me Parlamentin Evropian.
“Ne i shohim rekomandimin e Komisionit Evropian, konkluzionet e vendeve anëtare dhe kushtet e tyre specifike për zbatimin e reformës në drejtësi si inkurajim. Jemi plotësisht dakord me faktin se zbatimi i reformës në drejtësi përbën elementin themelor për çeljen e negociatave dhe për këtë ne shpresojmë që kjo të ndodhë sa më pare” u shpreh Ruçi. /tesheshi.com/
