Kupa e Botës 2026, ku do të marrin pjesë 48 ekipe kombëtare, do të mbahet për herë të parë në tre shtete dhe do të organizohet nga Shtetet e Bashkuara, Kanadaja dhe Meksika.
Federata Ndërkombëtare e Futbollit (FIFA) ka prezantuar në New York 16 qytete që do të jenë mikëpritëse të Kupës së Botës 2026.
Kupa e Botës 2026 do të mbahet për herë të parë në tre shtete dhe do të organizohet nga SHBA, Kanadaja dhe Meksika.
Për herë të parë në turne do të marrin pjesë 48 kombëtare, 16 më shumë se në Botërorin e këtij viti, që do të mbahet në Katar.
Kampionati do të luhet në 11 qytete amerikane (Atlanta, Boston, Dallas, Kansas City, Los Angeles, Miami, Houston, New York // New Jersey, Philadelphia, San Francisco, Seattle), dy kanadeze (Toronto, Vancouver) dhe tre qytete meksikane (Guadalajara, Mexico City, Monterrey).
“Ne kemi bërë një rrugë të gjatë në zgjedhjen e këtyre 16 qyteteve. Kjo është një ditë historike për qytetet e përmendura, të tre federatat e futbollit, por edhe për FIFA-n”, tha Gianni Infantino, president i organizatës ombrellë të futbollit.
Finalja nuk dihet ende se ku do të luhet
Shumica e stadiumeve kanë një kapacitet prej më shumë se 60,000 vendesh. Më i vogli është BMO Field në Toronto, i cili akomodon 30,000 spektatorë dhe do të ketë 45,000 vende pas rindërtimit. Më i madhi është Azteca në Mexico City me 87,523 vende. Por finalja nuk dihet ende se ku do të luhet.
“Ne ende duhet të diskutojmë (vendin ku do të mbahet finalja), të bëjmë një analizë dhe do të marrim një vendim kur të vijë koha”, shtoi Infantino.
Presidenti i FIFA-s njoftoi se distancat do të merren parasysh kur të përcaktohen grupet për qytetet pritëse, pasi disa qytete janë më shumë se 4000 kilometra larg.
“Në një rajon si Amerika e Veriut, ne duhet ta kemi parasysh këtë, për t’u siguruar që skuadrat që luajnë në grupe, ku tifozët nuk duhet të udhëtojnë distanca të çmendura, ashtu si ekipet,” tha Infantino.
Meksika ka pritur dy herë Kupën e Botës deri më tani (1970, 1986), Shtetet e Bashkuara një herë (1994), ndërsa për Kanadanë do jetë hera e parë.
Qytetet dhe stadiumet pritëse
Atlanta – Stadiumi Mercedes-Benz (71,000 vende)
Boston – Gillette Stadium (65,878)
Dallas – AT&T Stadium (80,000)
Kansas City – Arrowhead Stadium (76,416)
Los Angeles – SoFi Stadium (70,240)
Miami – Hard Rock Stadium (64,766)
Houston – NRG Stadium (72,200)
New York – MetLife Stadium (82,500)
Filadelfia – Lincoln Financial Field (69,796)
San Francisko – Stadiumi Levi’s (68,500)
Seattle – Lumen Field (69,000)
Toronto – BMO Field (30,000, pas zgjerimit 45,000)
Vankuver – BC Placedouble (54,000)
Guadalajara – Estadio Akron (49,850)
Mexico City – Stadium Azteca (87,523)
Monterrey – Estadio BBVA (53,500). /tesheshi.com/
