Ambasadori i SHBA-së në Kosovë, Jeff Hovenier, tha se Byroja Federale e Hetimeve (FBI) është duke hetuar sulmin në kanalin Ibër-Lepenc, në veri të Kosovës, transmeton portali Kossev.
Ai tha se Shtetet e Bashkuara të Amerikës (SHBA) kanë siguruar mbështetjen e FBI-së për rastin dhe se hetimet janë duke vazhduar, transmeton Beta.
“Ne kemi ofruar dhe kemi sjellë mbështetjen e FBI-së këtu në Kosovë për të punuar drejtpërdrejt dhe me kohë të plotë me autoritetet e zbatimit të ligjit në Kosovë, në mënyrë që të identifikohen ata që janë përgjegjës dhe të sigurohemi që hetimi të jetë i besueshëm, gjithëpërfshirës dhe të çojë në përfundime të duhura.”
Hovenier ka thënë se kur të zbulohet e vërteta do të bashkëpunojë me autoritetet e Kosovës në mënyrë që përgjegjësit e atij krimi të dalin para drejtësisë, njoftoi Kossev.
Hetimi është duke u zhvilluar
“Nuk është kurrë mirë që ambasadorët të komentojnë hetimet e zbatimit të ligjit dhe hetimet janë ende në vazhdim. Gjithçka që mund të them në lidhje me të dhënat, sugjerimet apo drejtimin e hetimit është se qeveria amerikane nuk është ende në gjendje të thotë se ne kemi arritur ndonjë përfundim apo se ne e dimë se kush është përgjegjës për këtë sulm”, tha ai.
Në komunën e Zubin Potokut në veri të Kosovës, nga një shpërthim në fund të nëntorit u dëmtua kanali Ibër-Lepenc, i cili furnizon me ujë disa ujësjellës si dhe termocentrale që furnizojnë Kosovën me energji elektrike.
Kryeministri Kurti deklaroi thënë se ishte një sulm kriminal dhe terrorist, pas të cilit qëndronte Serbia, me qëllim të dëmtimit të infrastrukturës kritike të Kosovës.
Por presidenti serb Vuçiç mohoi lidhjet e Serbisë me shpërthimin në kanalin në Zubin Potok, duke pretenduar se kishte një përpjekje për një sulm të ashpër hibrid ndaj Serbisë. /tesheshi.com/
