Nelson Mandela ështe arrestuar në vitin 1962 pas paralajmërimit të agjentit amerikan të CIA-s tek regjimi i aparteidit në Afrikën Jugore, ka njoftuar gazeta britanike Sunday Times.
Gazeta ka publikuar këtë informacion, bazuar në deklaratat e ish-agjentit të CIA-s dhe ish-zv/konsullit në Durban të Afrikës Jugore.
David Rickard në mars të vitit 2016, gjatë një interviste të dhënë enkas për një film të regjisorit John Irvin, kishte pranuar se CIA dhe ai kishin luajtur rolin kryesor për arrestimin e Mandelës.
Ai gjatë intervistës nuk ka treguar shenja pendimi, duke thënë se në vitin 1962 kur është arrestuar, Mandela ka qenë komunisti më i rrezikshëm në botë jashtë Bashkimit Sovjetik.
“Mandela ka mundur të shkaktojë luftë në Afrikën Jugore dhe SHBA do të ishin detyruar të ndërhyjnë pasi me gjasë gjërat do të shkonin në dreq të mallkuar’’, ka thënë Rickard.
Rickard, i cili ka vdekur para pak kohësh, nuk ka qenë kurrë i lidhur zyrtarisht me CIA-n, por ka punuar si diplomat në Afrikën Jugore deri para daljes në pension në fund të viteve të ‘70-të të shekullit të kaluar.
Zizi Kodwa, zëdhënës i partisë qeveritare të Mandelës në Afrikën Jugore, ka thënë se kjo nuk është diçka e re.
“Gjithmonë e kemi ditur që regjimi në atë kohë ka bashkëpunuar me Perëndimin’’, ka thënë ai për AFP’’.
Mandela ka kaluar 27 vite në burg. Është liruar në vitin 1990, dhe është njeriu i parë me ngjyrë i zgjedhur për President të Afrikës së Jugut. Në atë funksion ka qenë prej vitit 1994 deri 1999.
Ka vdekur në vitin 2013 në moshën 95-vjeçare.
CIA nuk ka dashur të komentojë në deklaratat e Rickard, ka njoftuar AFP. /tesheshi.com/
