Gazeta gjermane Bild raportonte javën e shkuar se 900 refugjatë të dehur ishin përfshirë në sulme masive seksuale gjatë vitit të ri në Frankfurt.
Bild përcillte “dëshmitë” e disa personave, mes të cilëve dhe të një pronari të një lokali, që kishte rrëfyer se, “Aata nuk flisnin gjermanisht, pinë pijet e të ftuarve tanë dhe kërcyen drejt tyre. Femrat më kërkuan ndihmë, sepse u sulmuan. Atmosfera ndryshoi plotësisht.”
I njëjti raportim u përcoll dhe në britaniken Daily Express.
E gjitha rezultoi të qe një mashtrim, një fabrikim i një lajmi të rremë. Policia gjermane deklaroi dy ditë më parë se pretendimet besohej të ishin krejt të pabaza.
“Marrja në pyetje e të punësuarve, e të ftuarve dhe e dëshmitarëve të supozuar kanë krijuar dyshime të konsiderueshme për portretizimin e ngjarjeve. Një nga viktimat e supozuara nuk ishte fare në Frankfurt në kohën kur pretendohet të ketë ndodhur krimi.”
Policia do të arrinte në konkluzionin se, “Masat e refugjatëve nuk ishin përgjegjëse për ndonjë sulm seksual në Fressgass gjatë vitit të ri. Akuzat janë tërësisht të pabaza.”
Bild u detyrua të kërkojë falje, pasi e fshiu më parë raportimin e turpshëm.
“Ne kërkojmë ndjesë për punën tonë,” shkroi kryeredaktori.
Ndërsa Daily Express nuk pranoi ta hiqte lajmin, por e zëvendësoi atë pas një kohe me një tjetër ku përfshihej dhe kërkimi ndjesë i Bild-it.
Prokurorët gjermanë po hetojnë ndërkohë dy persona për fabrikim të historisë së sulmit seksual nga refugjatët në Frankfurt. /tesheshi.com/
