Euroliga, aktiviteti kryesor i basketbollit për klubet europiane, është në javën e dytë të sezonit të ri. Dhe që në ndeshjet e dyta nuk kanë munguar përplasjet e forta.
Një përplasje e tillë ka qenë mbrëmë në Pire të Athinës, ku janë ndeshur Olimpiakosi me Anadollu Efesin. Një takim i zotëruar plotësisht nga grekët, që edhe kanë fituar thellë, 90-66.
Për turqit ka folur vetëm dhjetëminutëshi i dytë i lojës, ndërkohë që në tre periodat e tjera epërsia ka qenë në anën e të zotëve të shtëpisë.
Spanulis dhe Printezis ishin më të mirët për Olimpiakosin, duke shënuar përkatësisht 17 dhe 15 pikë. Osman i Anadollu Efesit ishte lojtari që shënoi më shumë gjatë ndeshjes, saktësisht 22 pikë. Kjo ishte fitorja e parë e Olimpiakosit në këtë sezon të Euroligës.
Në Tel-Aviv, në një takim midis dy emrave të njohur të basketbollit europian, Reali i Madridit fitoi 82-89 ndaj Makabit vendas.
Skuadra e Madridit udhëhoqi 33-46 pas mbarimit të pjesës së parë, por izraelitët u kthyen në lojë dhe në kryesim teksa shënuan 16 pikë me nisjen e dhjetëminutëshit të tretë kundrejt zero pikëve të kundërshtarit. Rudi Fernandez qe vendimtar në marrjen rishtas të epërsisë nga Reali, që në fund iu gëzua fitores së dytë në dy javë.
Dy takime të tjera klasike të Euroligës pasojnë këtë të premte, CSKA e Moskës – Panathinaikos dhe Barcelona – Fenerbahçe. Po ashtu do të luhen dhe sfidat Gallatasaraj – Crvena Zvezda dhe Zhalgiris Kaunas – Baskonia. /tesheshi.com/
