Mbrëmjen e shkuar, duke folur në një iftar të shtruar nga Gjysmëhëna e Kuqe turke, Erdogani deklaroi se nuk do të lejohet krijimi i një shteti të ri në jug të Turqisë dhe në veri të Sirisë.
“E nënvizoj edhe një herë qëndrimin e Turqisë: Ne nuk do të lejojmë ngritjen e një shteti në jug të Turqisë jugore dhe në Sirinë Veriore.”
Presidenti turk e shprehu vijimësisht shqetësimin e tij mbi zhvendosjen masive të turkmenëve dhe arabëve për shkak të përparimit kurd në Tel Abjad, dhe tha se operacioni kundër ISIS-it po e zëvendëson popullsinë me kurdë të lidhur me PKK-në, të parë si një kërcënim për Turqinë.
Erdogani deklaroi se ishte e qartë se Esadi, ISIS-i, YPG-ja, Njësitë e Mbrojtjes Popullore, dhe PKK-ja janë në një lloj bashkëpunimi.
Ai po ashtu u dha përgjigje dhe akuzave se shpërthimet e makinave-bombë në Kobani u ideuan dhe u bënë nga militantët e ISIS-it të ardhur nga Turqia.
Sipas tij, ata të cilët po përpiqen ta bashkëshoqërojnë Turqinë me organizata terroriste po bëjnë shpifjen më të madhe kundër këtij vendi e këtij populli, dhe kujtoi se Turqia ishte ajo që i ndihmoi refugjatët e Kobanit gjatë sulmeve të ISIS-it.
Turqia po ndjehet prej kohësh e shqetësuar nga zhvillimet e fundit në veri të Sirisë, ku kurdët e PYD-së, Partisë së Unionit Demokratik Kurd, dhe YPG-ja, që Ankaraja i sheh si zgjatim të PKK-së, organizatës terroriste kurde, po fitojnë ndjeshëm terren, pasi ato morën dhe qytetin kufitar të Tel Abjadit. /tesheshi.com/
