Më në fund, Shkodra e përgjakur i është besuar Niko Brahimajt, një prej kryepolicëve të karrierës në 30 vitet e fundit në Shqipëri. Ai do ketë misionin e vështirë që të kthejë paqen e humbur në qytetin verior, i cili afro një vit ka regjistruar 11 të vrarë në një konflikt mes fiseve rivale, të emërtuar dhe si “luftë bandash”.
Po kush është njeriu që ministri Lleshaj e emëroi drejtor të Policisë së Shkodrës në vend të Vehbi Bushatit, fill pas dy vrasjeve më të fundit, ku viktmë mbetën vëllezërit Astrit dhe Brahim Bilali.
Shqiptarja.com ofron një CV të tij telegrafike, duke veçuar faktin se vite më parë ishte njeriu që shoqëroi në komisariat vetë Sali Berishën.
Niko Brahimaj ka mbajtur poste të larta drejtuese në Policinë e Shtetit në vite. Së fundmi ishte drejtor për Hetimin e Krimeve të Rënda në Drejtorinë e Përgjithshme të Policisë, ku nuk ka hezituar të shprehë hapur edhe në një takim të fundit kritikat për Policinë e Vlorës sa i përket luftës anti-kanabis. Ka mbajtur detyrën e drejtorit të Forcave Operacionale, që ka në varësi edhe forcat elitë të Policisë së Shtetit, RENEA-n.
Ai njihet edhe për ngjarjen e 20 nëntorit të vitit 2000, ku një skuadër e drejtuar nga prej tij shoqëroi në polici Sali Berishën, në atë kohë kryetar i opozitës së atëhershme, pas djegies së Komisariatit të Tropojës. Niko Brahimaj mbante postin e nëndrejtorit të Policisë së Shtetit, në kohën kur në krye të saj qendronte Bilbil Mema. Në vitin 2005, pak muaj pasi Berisha erdhi në pushtet, Niko Brahimaj u transferua në Policinë e Tropojës. Në vitin 2013 Niko Brahimaj u rikthye ku drejtoi Policinë e Lezhës – raporton Shqiptarja.com. /tesheshi.com/
