Ngjarja e Elbasanit vetëm sapo gërvishur pak një kore të prejkahershme të plagës brenda kupolës së Policisë së Shtetit, e cila u hap menjëherë pas largimit të Saimir Tahirit nga posti i Ministrit të Brendshëm.
Burime të brendshme nga ky dikaster bëjnë të ditur se ka mbi dy javë që është ndërprerë komunikimi ndërmjet Ministrit Fatmir Xhafaj dhe Drejtorit të Policisë, Haki Çako.
Madje pjesa e lartë e uniformave blu presin që pas kthimit nga Kina Çakos, i cili ka shkuar në Kongresin Botëror të Interpolit, të ketë ndryshime të rëndësishme në radhët e policisë, ndryshime të cilat mund të “praktikohen” që tani gjatë mungesës së Çakos.
Vetë ministri Xhafaj deklaroi në seancën e Kuvendit ditën e enjte se do të nisë menjëherë vettingun në Polici, që presupozon ndryshim total të të gjithë zinxhirit komandues të Policisë së Shtetit.
Mësohet se edhe Edi Rama në konsultim me Xhafajn pothuajse e kanë marrë vendimin pas ngjarjes së Elbasanit, por kanë pritur që të përfundojë hetimi i Prokurorisë dhe raporti i SHKBA-së që heton uniformat në shkeljen e rregullave dhe ligjeve.
Dilema e vetme në këtë pikë mësohet se është nëse ndryshimi do të nisë me vetë Haki Çakon apo tërmeti do të zhvillohet me dy faza, pra të ndryshojë njëherë grupi i drejtorëve në qarqe dhe në pjesën e dytë të tronditet kupola e lartë.
Ndryshimet në fakt diheshin që pas ardhjes së Fatmir Xhafajt në krye të ministrisë. Por ky i fundit ka përdorur një taktikë dinake, duke lënë që këto dy javë të zhvillohet një luftë e vërtetë e brendshme brenda klaneve të Policisë së Shtetit.
Kjo lloj lufte ka shkuar deri në veprime që pritet të marrin një ndëshim nga lart, pasi kanë ndodhur rrjedhje informacionesh të klasifikuara disa herë në media.
Ftohja mes Çakos dhe Xhafajt ka ndodhur edhe për faktin tjetër, atë pas daljes së dokumenteve të klasifikuara, prej të cilave janë shfaqur skandale si ai i refuzimit të një përgjimi të kërkuar nga Prokuroria, me pretendimin e “njerëzve me leje”, apo e oficerëve të lartë që rezultonin të dënuar në shtetin fqinj.
Me një mjeshtëri taktike Xhafa ka krijuar kështu të gjitha kushtet për të nisur mjaft kollaj atë që e ka quajtur “vetting në Policinë e Shtetit”.
Në fillim pjesë e këtij provimi do të jenë krerët më të lartë të uniformave blu, për të cilët, një komision i ngritur nga Fatmir Xhafën do të përdorë të njëjtin pyetësor si ai i profesor Kabos përballë disa drejtuesve të Fakultetit Juridik.
Krerët e Policisë do të japin llogari për pasurinë e tyre, shtëpitë, banesat automjetet apo jetën që bëjnë.
Pikërisht pas këtij pyetësori që pritet të mbyllet në javën e parë të tetorit, do të rinovohet e tërë kupola e lartë.
Xhafaj dhe kryeministri Edi Rama mësohet se janë konsultuar edhe për drejtorin e ri të Përgjithshëm të Policisë, por ka pak informacione se çfarë është vendosur.
Rama ka mbështetur që në fillim idenë që Policia e Shtetit duket të ndjekë modelet perëndimore që të mos ketë shumë ndryshime në kreun e madh të saj, pasi kjo shkakton pasiguri dhe mungesë stabilitet.
Pastaj, për ndryshimin e nivelit të lartë pritet që të gjendet një kandidaturë që mund të plotësojë kriteret për të qenë drejtues i parë, por edhe të ketë një karizëm brenda uniformave blu. /tesheshi.com/
