Kreu demokrat Basha ka shënuar një precedent në politikën shqiptare, më saktë në debatin politik, ku një seancë parlamentare me një temë dite specifike, siç ka qenë ratifikimi i Protokollit të Maqedonisë në NATO, me prezencën dhe të kryeparlamentarit Talat Xhaferi, e ka shndërruar në një denoncim ndaj qeverisë, me narrativën e njohur të politikës së ditës, duke bërë një transformim të habitshëm të klimës parlamentare ku në qendër ishte Maqedonia Veriore në NATO. Por Basha, duke bërë një kalim nga denoncimi ndaj qeverisë së Gruevskit, duke e quajtur dhe atë si të lidhur me krimin e organizuar dhe korrupsionin, mbërriti te Rama, duke derdhur drejt tij lumin e akuzave të përditshme.
“Këta njerëz ketu kanë ardhur në pushtet si shprehje e një grushti kriminelësh. Kjo është arsyeja se pse nuk mund të festojmë me ju, zoti Talat Xhaferi. Shqipëria nuk do ta marrë hapjen e negociatave në qershor. Ky është morti i dytë zoti Xhaferi, morti i rënies së shtetit të Shqipërisë.
Një grup oligarkësh që kanë kapur Shqipërinë. Kjo është arsyeja pse në këtë ditë ne nuk mund të festojmë me ju, por frika e tyre është që këtë qershor Shqipëria nuk mund ta marrë dritën jeshile të hapjes së negociatave. Sot kemi një problem të gjithë problemeve. Të shtunën do jetë protesta më e madhe”, kanë qenë disa nga frazat e Bashës, në një fjalim që vetëm në 1/4 ka qënë me temën e anëtarësimit të fqinjit lindor në NATO, ndërsa në 3/4 ka qenë një vërshim akuzator ndaj qeverisë, si i zakonshmi i viteve të fundit dhe i seancave të fundit.
Ka qenë më pas reagimi i Ramës, i shkurtër por dhe pa nervoz, pasi nuk e priste që për vetë natyrën e seancën, gjuha e saj të rrëshqiste drejt asaj të përditshmërisë me akuza dhe thirrje për protestën e 16 shkurtit.
“Ju kërkoj ndjesë për këtë shkelje të kodit të mikpritjes por ju siguroj se fëmiu që sapo foli nuk i mendon ato që thotë por nuk di se çfarë thotë, edhe një herë ju kërkoj ndjesë”, tha Rama menjëherë pas fjalimit të Bashës.
Pas këtyre frazave të Ramës, erdhi dhe ai gjest i parecedent nga ana e Palokës, i cili qëlloi me bojë shefin e qeverisë. /tesheshi.com/
