Edi Rama dhe Ramush Haradinaj kanë lançuar nga mbledhja e përbashkët në Korçë unifikimin e doganave si dhe firmosjen në Vlorë të 12 marrëveshje të përbashkëta.
Kryeministri shqiptar, Edi Rama, theksoi se nga mbledhja do të ketë rezultate konkrete, ndër të cilat hapja e portit të Durrësit, si dhe e zyrës operacionale të Kosovës.
“Kemi strukturuar mënyrën e punës, kemi ngritur sekretariatin e përbashkët për punën ndërministrore në funksion të zbatimit të marrëveshjeve. Heqje të barrierave tarifore, po punohet për hapjen e pikave të tjera doganore. Kemi ende punë për të bërë për të ulur më tepër kohën që qytetarët të kalojnë në kufi. Do të hapim zyrën operacionale të Kosovës në portin e Durrësit. Hapja e zyrës do të ndikojë në shkëmbimin tregtar mes dy vendeve.
Në Shqipëri operojnë 600 kompani nga Kosova, 2.7% volumi tregtar. Do të heqim barrierat doganore mes dy vendeve, por edhe me vendet e rajonit me gjerë. Le të punojmë që ky takim të çelë një tjetër kapitull jo vetëm në politikën rajonale, por edhe të integrimit në BE. Është në dorën tonë që historinë ta shkruajmë që nesër të flasë mirë për ne. Duhet vetëm të vendosim se cfarë do të shkruajmë dhe atë ta bëjmë realitet” deklaroi Rama.
Ndërsa kryeministri i Kosovës, Ramush Haradinaj theksoi se sfida e qeverisë së tij është lufta ndaj korrupsionit, ndërsa kërkoi nga Serbia njohjen e pavarësisë në fund të bisedimeve.
“Sot në Kosovë parametrat flasin për më shumë rend dhe ligj, duhet të luftojmë korrupsion, pasi rrezikon Kosovën në shumë drejtime. Ne po luftojmë për ekonominë, me politikat fiskale, por edhe zvogëlimin e burokracisë, duhet të bëjmë më shumë punë në logjistikë.
Kosova ballafaqohet me shumë sfida. Jemi të vendosur për dialogun me Serbinë, por e mendojmë në momentet finale dhe epilogu duhet të sjellë njohjen e Kosovës nga Serbia. Në dialog duhet të marrë pjesë edhe SHBA.
Në planin rajon jemi të interesuar që të thellojmë marrëdhëniet me të gjitha vendet. Në planin ndërkombëtar, Kosova është në vështirësi me njohjet dhe këtu kërkoj edhe njëherë se vetëm së bashku edhe Shqipëria mund të nda ndihmojë”, tha Haradinaj. /tesheshi.com/
