Në tre intervistat e fundit televizive, Ministri i Brendshëm Dritan Demiraj, ka dhënë një mesazh të rëndësishëm ku ka shprehur vullnetin e tij politik për t’i shërbyer institucioneve të vendit.
Si tek Fevziu, ashtu edhe në intervistat dhënë gazetarëve Sokol Balla dhe Anila Hoxha, Demiraj ka dhënë profilin e një zyrtari më shumë profesional sesa politik, ndërsa kolegët e tij teknikë kanë qenë të angazhuar edhe në debate politike.
Pikërisht kjo gjuhë e përdorur, por edhe zërat që qarkullojnë prej muajsh, kanë rritur gjasat e një angazhimi të zotit Demiraj në institucionet mbipartiake që pritet të formohen në kuadër të reformës në drejtësi dhe ndryshimeve kushtetuese.
Duke qenë ushtarak i lartë, mund të ekzistojë edhe mundësia apo hipoteza e emërimit të ministrit të Brendshëm në strukturat e larta të Forcave të Armatosura ku ka punuar, por këtë herë në një piacë më të lartë, si për shembull Shef i Shtabit të Përgjithshëm.
Por që të ndodhë ky emërim, së pari zoti Demiraj duhet të marrë gradën “gjeneral”, e cila jepet nga Presidenti i Republikës.
Megjithatë, profili ushtarak i kolonel Demirajt është drejtimi operacional i Forcave Speciale dhe jo komandimi i kontigjenteve të mëdha tokësore, detare apo ajrore, siç ndodh rëndom në emërimet e krerëve të ushtrisë.
Por gjithsesi, në ushtrinë shqiptare ka edhe kapërcime pindarike.
Për shembull Komandanti i Flotës Detare është një oficer këmbësorie.
Në intervistën tek Fevziu, Ministri i Brendshëm e afroi më shumë angazhimin e tij në struktura joushtarake, por civile.
Dhe pikërisht tek këto struktura, vendi më ideal i mundshëm që mund të angazhohet kolonel Demiraj, është drejtimi i Byrosë Kombëtare të Hetimit, i cili do të jetë një nga institucionet më të rëndësishme të reformës në drejtësi dhe që do të kërkojë një bashkëpunim bipartizan ndërmjet mazhorancës dhe opozitës.
Dhe ka shumë gjasa që këto hipoteza që po diskutohen tani, të jenë biseduar edhe në takimin e famshëm të 18 majit ndërmjet Edi Ramaës dhe Lulzim Bashës, natyrisht me ndërhyrjen energjike të zyrtarit të lartë të DASH, Hoyt Brian Yee.
Edi Rama e ka thënë mëse njëherë që pakti me Bashën do të vazhdojë edhe pas zgjedhjeve dhe e përsëriti edhe në mitingun e fitores në sheshin “Skënderbej”.
Byroja Kombëtare e Hetimit, e cila do të merret me hetimin e zyrtarëve e politikanëve të korruptuar do të duhet të miratohet me 84 vota në Kuvend dhe që të ketë një punë sa më të qetë, ajo kërkon një konsensus dhe jo kontestim nga palët politike.
Tjetër element shtesë që favorizon Demirajn, është se gjatë qëndrimit në SHBA, ai ka punuar si trajnues fizik në Akademinë, ku trajnohen kadetët e FBI-së amerikane.
Vend, ku prej një viti janë trajnuar edhe një grup shqiptarësh që pritet t’i bashkangjitet edhe Byrosë Kombëtare të Hetimit.
Në krye të Ministrisë së Brendshme, Demiraj erdhi edhe si një kandidaturë e përkrahur nga amerikanët, të cilët e kanë monitoruar punën e tij në krye të dikasterit më të rëndësishëm në vend.
Punë që Demiraj e kreu pa asnjë problem, konflikt apo përlasje politike e institucionale. Ai arriti të krijojë një klimë grupi me njerëzit e Ministrisë që kishin punuar me Xhafën e Tahirin, si dhe me drejtorët e policisë.
Ndaj, një afrim i tij tek hetimi i korrupsionit do të ishte një hap i mundshëm.
Duke shtuar këtu edhe mundësinë që Lulzim Basha të drejtojë Komisionin Parlamentar për Reformën Kushtetuese, atëherë opozita vjen me një rol shumë më të fuqizuar institucional që puna të çojë në një stinë të qetë dhe bashkëqeverisjeje, megjithëse duke mos qenë në kabinet. Pra, PS ka qeveverinë dhe opozita ka në dorë reformat dhe një pjesë të drejtësisë.
/tesheshi.com/
