Kuvendi i Kosovës sot po mban seancë të jashtëzakonshme ku po diskuton për dënimin e grupit të “Drenicës”.
Por, kjo seancë me nismëtarë deputetët e Partisë Demokratike të Kosovës (PDK) është vlerësuar si ndërhyrje në drejtësi nga organizata joqeveritare dhe njohës të drejtësisë.
Organizata Demokraci Plus (D+), thotë se veprimi i Kuvendit cenon rëndë pavarësinë e pushteteve të pavarura të përcaktuara me Kushtetutën e Kosovës.
Ai thotë se trajtimi dhe debati politik i vendimeve të institucioneve të pushtetit gjyqësor është ndërhyrje e drejtpërdrejtë në pushtetin gjyqësor dhe paraqet praktikë të rrezikshme për të ardhmen e vendit.
Kjo organizate që monitoron punën e Kuvendit rikujton se ky nuk është rasti i parë dhe i vetëm ku Kuvendi i Kosovës hapur dhe drejtpërdrejt i ndërhyn gjyqësorit.
“Praktika të tilla kanë ndodhur edhe në të kaluarën në raste të ngjashme si debati parlamentar për rastin ‘Kiqina’. Ky debat dhe të tjerët të ngjashëm tregon për shpërfilljen e hapur të partive politike dhe Kuvendit të Kosovës për pushtetin gjyqësor”, thuhet në reagimin e Demokraci Plus.
Kjo organizatë kërkon reagimin e Këshillit Gjyqësor të Kosovës në lidhje me këtë rast, pasi që mos reagimi nga ana e këtij institucioni do të mund të dërgonte mesazhin se këto institucione i nënshtrohen urdhrave të politikës e në këtë rast Kuvendit të Kosovës.
Ndaj, thirrjes së kësaj seance të jashtëzakonshme ka reaguar edhe profesori i Juridikut, Riza Smaka i cili paoshtu e vlerëson hyrje në drejtësi.
Profesori Riza Smaka ka thënë se reagimet e partive politike e më paststaj paralajmërimi për mbajtjen e një séance të Kuvendit ku pritet të flitet rreth rastit ‘Drenica’ nuk mund të trajtohet ndryshe vestëm si ndërhjyrje në punën e gjyqësorit.
Sipas tij, gjyqësori do të duhej të mos trazohej nga pushtetarët e legjislativit, e aq me pak nga ata të ekzekutivit.
“Sepse kjo mund të ndikojë në pavarësimin e gjyqësorit dhe marrjen e vendimeve”, ka thënë Smaka.
Ai ka kërkuar nga qeveria e Kosovës që të krijojë lehtësira për gjyqartë dhe prokurorët duke rritur numërin e gjyqtarëve dhe prokurorëve, ndërsa në anën tjetër, ka kërkuar uljen e numërin të ministrive të cilat sipas tij, janë barrë për buxhetin e shtetit. /tesheshi.com/
