Një ditë pas zgjedhjes së Hashim Thaçit president, janë djegur zyrat e Partisë Demokratike të Kosovës në Deçan, komunë kjo e cila udhëhiqet nga Aleanca për Ardhmërinë e Kosovës.
Lajmin e ka bërë publik përmes një fotografie të postuar në profilin e saj në Facebook, deputetja e PDK-së nga Deçani, Safete Hadërgjonaj.
“Po çfarë ju ka bërë zyra e PDK-së në Deçan që e dogjët…huliganizmi nuk paska fund. Turp e faqja e zezë”, ka shkruar ajo.
Ndërsa, i menjëhershëm ka qenë reagimi i Kryesisë së PDK-së e cila e ka dënuar fuqishëm djegien e zyrave dhe kërkon që ky akt të ndriçohet sa më shpejt dhe autorët e kësaj vepre të shëmtuar të vihen para drejtësisë.
“Këto akte janë me motive politike dhe cenojnë pluralizmin, teksa kërkojmë nga organet kompetente ta ndriçojnë sa më parë rastin. Aktet e tilla që kanë motive të qarta politike dhe të cilat cenojnë pluralizmin janë të papranueshme dhe të dënueshme”, thuhet në kumtesë. /tesheshi.com/
