Parlamenti i Maqedonisë bëhet gati t’u heqë imunitetin e 6 deputetëve, ndërkohë që Ministria e Brendshme ka arrestuar 12 persona të akuzuar për dhunën e 27 prillit, ndër të cilët mësohet se njëri ka qenë drejtues i lartë i dhërbimit sekret maqedonas dhe bashkëpunëtor shumë i afërt i Nikolla Gruevskit.
Komisioni për Çështje të Rregulloreve dhe të Mandatit dhe Imunitetit miratoi kërkesën e Gjykatës Penale për heqjen e imunitetit të 6 deputetëve: Kërste Mukovski, Johan Tarcullovski, Luben Arnaudov, Sasho Vasilevski, Lupco dimovski, Zhaklina Peshevska.
“Janë dhënë urdhra për arrestimin e 36, ndërsa për 12 persona akoma po gjurmohet, ata me siguri janë në Republikën e Maqedonisë”, deklaroi ministri i Brendshëm, Oliver Spasovski.
Ai nuk deshi t’i përmendë emrat e personave që kërkohen, as se a ka deputet mes tyre ose organizatorë të ngjarjeve të 27 prillit, duke theksuar se ato të dhëna nuk mund të bëhen publike.
Por Spasovski ka bërë të ditur se në Ministrinë e Brendshme tashmë ka nisur fshesa.
“Të gjithë ata të cilët janë të punësuar në MPB, nëse u caktohet masë arresti, pas raportimit marrëdhënia e tyre e punës pezullohet. Për ata për të cilët deri më tani nuk është udhëhequr procedurë disiplinore hapet mundësia për ngritjen e kësaj procedure”, sqaroi Spasovski.
Lidhur me mundësinë që të rritet numri i personave të dyshuar për ngjarjet e 27 prillit, theksoi se për këtë vendos prokuroria. /tesheshi.com/
