Dy gjeneralë të lartë amerikanë dëshmuan në Kongres se ata rekomanduan mbajtjen e një force prej 2500 trupash në Afganistan, para tërheqjes së plotë të Shteteve të Bashkuara në gusht.
Dëshmia e Gjeneral Mark Milley dhe Gjeneral Frank McKenzie në Kongres të martën kundërshton Presidentin Joe Biden, i cili tha se nuk i mban mend këshillat e tilla, sipas BBC.
Talibanët morën pushtetin në gusht, pasi përparuan me shpejtësi nëpër vend.
Gjenerali Milley tha se Shtetet e Bashkuara ishin të befasuara nga shkalla e shpërbërjes së qeverisë afgane.
Dy gjeneralët amerikanë u morën në pyetje të martën nga Komiteti i Senatit për Shërbimet e Armatosura së bashku me Sekretarin e Mbrojtjes Lloyd Austin.
Seanca dëgjimore vjen javë pas tërheqjes kaotike në aeroportin e Kabulit, ndërsa forcat e huaja u përpoqën të sillnin qytetarët e tyre në shtëpi, dhe mijëra afganë të dëshpëruar u lutën për shpëtimin e tyre.
Një sulm vetëvrasës gjatë operacionit të tërheqjes vrau 182 njerëz. Trembëdhjetë amerikanë dhe të paktën 169 afganë u vranë më 26 gusht në hyrje të aeroportit.
Rekomandimet e përgjithshme
Gjenerali McKenzie, i cili drejtoi Komandën Qendrore të SHBA mbikëqyri tërheqjen nga Afganistani, tha në seancë se ai rekomandoi mbajtjen e 2,500 trupave në Afganistan.
Kjo duket se bie ndesh me pretendimin e Presidentit Joe Biden për një reporter të ABC më 19 gusht se ai nuk mban mend që dikush t’i ketë dhënë një këshillë të tillë.
Gjenerali Milley tha se ishte dakord me rekomandimin, por kur u pyet nga republikani i Alaskës Dan Sullivan nëse komentet e zotit Biden ishin një “deklaratë e rreme”, ai nuk pranoi të japë një përgjigje të drejtpërdrejtë.
Më vonë, zëdhënësja e Shtëpisë së Bardhë Jen Psaki komentoi çështjen.
“Presidenti vlerëson këshillën e sinqertë të… shefave të përbashkët dhe ushtrisë. Kjo nuk do të thotë se ai gjithmonë pajtohet”.
Ajo tha se nëse trupat mbeteshin në Afganistan pas gushtit, SHBA tani do të ishin në luftë me talebanët. /tesheshi.com/
