Në një fjalim në Universitetin Amerikan në Kajro, Sekretari amerikan i Shtetit, Mike Pompeo sulmoi ashpër Iranin, duke shfaqur vizionin e administratës së Presidentit Donald Trump për Lindjen e Mesme.
Ai bëri thirrje për t’i dhënë fund rivaliteteve të Lindjes së Mesme për të ndalur ndikimin e Teheranit dhe i kërkoi Sirisë “që të heqë nga territori çdo çizme iraniane”.
“Është koha t’i japim fund rivaliteteve të vjetra për të mirën e rajonit”, tha Pompeo në kuadër të një turneu në Lindjen e Mesme, të cilin e ndërmorri pas njoftimit të tërheqjes së ushtrisë amerikane nga Siria.
Ai shtoi se Shtetet e Bashkuara do të përdorin diplomacinë dhe do të punojnë me partnerë, për të dëbuar “çizmen e fundit iraniane nga Siria” dhe për të rritur përpjekjet për të “siguruar paqen dhe stabilitetin për popullin e shumëpritur sirian”.
Pompeo e quajti politikën e paraardhësit të Trump, Barak Obama, si të gabuar, duke deklaruar se ai uli rolin e Amerikës në rajon dhe inkurajoi armikun e tij më të madh – Iranin.
Ai shtoi se Obama ishte naiv kur u përball me sfidat pas rebelimit që shpërtheu në Lindjen e Mesme dhe Egjipt, duke filluar nga viti 2011.
Pompeo shkoi deri aty sa fajësoi administratën e mëparshme për ngritjen e ISIS-it dhe forcimin e besimit të Iranit, që ishte pasojë e sanksioneve pas nënshkrimit të një marrëveshjeje mbi programin bërthamor.
Duke i quajtur SHBA një “fuqi të mirë” në Lindjen e Mesme, Pompeo u përpoq të bindte aleatët se amerikanët do të mbeteshin të përkushtuar për të eleminuar kërcënimin e paraqitur nga ISIS pas tërheqjes së forcave amerikane nga Siria. /tesheshi.com/
