Një deklarim i Kreshnik Spahiut, në formën e një përbetimi për “ta kallë” Kryeministrinë më datë 18 shkurt, ditën kur opozita ka paralajmëruar nisjen e një stine protestash, ka marrë jo pak vëmendje. Jo aq pse e thënë nga goja e tij – ngaqë kjo është e zakonshme tashmë; ku në fakt ndodh diçka e afërt me sa herë grupimi kuqezi proteston para dyerve të ndonjë dikasteri qeveritar – por ngaqë kjo e ushqen më tepër përceptimin e një pjesë të opinionit se kthimi në rrugë i opozitës do tentojë prodhimin e një “21 janari” të saj.
Në fakt, ngjarja tragjike e 6 viteve më parë, politikisht i ndihu shumë opozitës së atëhershme, sot mazhorancë qeverisëse. Ajo ishte një ndër ngjarjet kthesë në ndryshimin e qëndrimit kah qeveria dhe kah opozita nga ana e opinionit publik, që dy vjet më pas do përkthehej në votë. Madje kjo ka ndodhur brenda një dite. Deri në orët e mbrëmjes së 21 janarit, shumica e njerëzve turfullonin ndaj opozitës si shkaktare e vërtetë e asaj katrahure dhe tragjedie në zemër të Tiranës; por pas daljes së pamjeve filmike ku oficerë të gardës qëllonin në mish e merrnin jetë si të ishin në gjueti lepujsh, bëri që zemërimi të kalonte tek qeveria e të binte mbi të.
Dhe opozita e sotme e ka të qartë metamorfozën e pasuar nga si zhvillim, prej së cilës edhe sot ndihet e viktimizuar. Për momentin, paçka dështimeve spektakolare të qeverisë Rama në disa zëra, opozita nuk arrin dot të frymëzojë, të bindë dhe premtojë se vërtet e meriton t’i besohet qeverisja. Protestat e saj janë, ndër të tjera, edhe një tentativë për të mobilizuar nervin e fikur të elektoratit të saj, por edhe për të treguar muskujt në tenativë për t’u marrë në konsideratë nga faktori ndërkombëtar. Kujtojmë se dhe Rama, e arriti të këtë të fundit, pas vrasjeve të 21 janarit.
Dhe rreshtimi i grupimit kuqezi krah PD-së atë ditë, gjithsesi mund të sjellë trazira. Spahiu dhe ndjekësit e tij plismbajtës, disa dhe me daulle,tashmë e kanë kthyer në englendisje që të bëjnë ndonjë proçkë e për këtë të përfundojnë ca orë në komisariat. Madje kur ndodh kjo, ata si grupim përjetojnë një orgazëm politike sa që shtyhen akoma dhe më shumë drejt krijimit të incidenteve, si një identitet pas së cilit mbahen dhe ekzistojnë.
Interesante është dhe metamorfoza e Kreshnik Spahiut: nën opozitën socialiste, gjuha e tij karshi Berishës ishte e atillë sa të majtët ngjanin si pula të urta para liderit të demokratëve dhe qeverisjes së tij; ndërsa tani, ish-kreu i KQZ-së së zgjedhjeve të vitit ’96 dhe njëherësh ish-n/kryetari i KLD-së në afro 5 vite të pushtetit të Berishës, do jetë krahëpërkrah me të më 18 shkurt. /tesheshi.com/
