Rrjetet sociale kanë dhënë mundësi të pashembullta për komunikim, por gjithashtu kanë sjellë shumë probleme, siç janë lajmet e rreme, dhe ato duhet të rregullohen, por që të mos rrezikohet liria e shprehjes, është thelbi i debatit në Parlamentin Evropian.
“Mediat sociale kanë transformuar mënyrën se si ne komunikojmë me njëri-tjetrin, sollën mundësi të reja, por edhe shumë probleme të reja,” tha Zëvendës Presidentja e Komisionit Evropian për Vlerat dhe Transparencën, Vera Jourova.
Dhjetëra deputetë morën pjesë në debatin mbi kontrollin demokratik të rrjeteve sociale dhe mbrojtjen e të drejtave themelore.
Fuqia e korporatave të mëdha të teknologjisë
Shumica e tyre tregojnë se nuk ka vend në rrjetet sociale për gjuhë urrejtjeje dhe nxitje të dhunës dhe se nuk mund t’u lihet kompanive private të teknologjisë për të përcaktuar se kush mund dhe çfarë mund të publikohet, sepse kjo duhet të jetë punë e institucioneve demokratike.
“Eshtë koha për të frenuar fuqinë e shfrenuar të korporatave të mëdha të teknologjisë, por në çdo rast, liria e fjalës duhet të ruhet. Unë nuk dua të kem një ministri ose arbitra të së vërtetës, ky është një parim kryesor”, theksoi Jourova.
“Ne duhet të vendosim rregull në fushën dixhitale dhe t’i japim fund ‘Perëndimit të Egër dixhital’. Ajo që është e paligjshme jashtë linje (në realitet), duhet të jetë e paligjshme dhe në internet,” tha ajo.
Ajo vuri në dukje se ndryshimi midis fakteve, që i përkasin të gjithëve, dhe mendimit, që i përket individit, ka humbur.
“Ky ndryshim është thyer dhe mund të rregullohet vetëm nëse ka besim në shkencë dhe institucione demokratike”.
Sjellja e rendit në botën dixhitale
Ajo shtoi se ndërhyrja e dhunshme në ndërtesën e Kongresit amerikan tregoi forcën e rrjeteve sociale, të cilat, bazuar në kriteret e tyre, vendosën të mbyllnin përgjithmonë profilin e ish-presidentit amerikan.
“Eshtë mjaft shqetësuese, megjithëse besoj se nxitja e papërgjegjshme e dhunës nga ish-Presidenti Trump e meriton atë,” thotë Jourova.
Në dhjetor të vitit të kaluar, Komisioni Evropian njoftoi propozimet për rregulla të gjera që synonin të sillnin rregull në botën dixhitale, duke përfshirë rrjetet sociale, tregtinë në internet dhe platforma të tjera të internetit.
Komisioni ka propozuar dy rregullore – ligjin për shërbimet dixhitale dhe ligjin për tregjet dixhitale, të cilat parashikojnë një seri detyrimesh dhe ndalimesh, si dhe sanksione që duhet të shërbejnë për të parandaluar aktorët e mëdhenj të internetit që të abuzojnë me pozicionin e tyre.
Jourova njoftoi se ajo do të propozonte një rregullore të re mbi reklamat politike në Internet.
“Promovim i paguar, pëlqime të paguara, reagime nga profile të rreme, janë të rrezikshëm për demokracinë, veçanërisht gjatë periudhës së zgjedhjeve, dhe kjo është arsyeja pse unë do të propozoj një rregullore mbi reklamat politike në Internet,” tha Jourova.
Jo vetëm ligjet, por edhe norma morale
Diskutimi gjithashtu vuri në dukje se nuk mjafton të përqendrohesh vetëm në rregullimin e rrjeteve sociale dhe platformave të internetit, por që është e nevojshme të punosh mbi edukimin mediatik, në mënyrë që njerëzit të kuptojnë faktet themelore se si funksionon Interneti dhe pse ata e shohin përmbajtje të caktuar.
Nga ana tjetër, kompanitë e teknologjisë duhet të udhëhiqen jo vetëm nga ligjet dhe rregulloret, por edhe nga normat morale.
Arkitektët ndjekin jo vetëm ligjet, por edhe normat morale për të siguruar që ndërtesat e tyre janë të sigurta.
Kështu, ata që shkruajnë kode dhe algoritme duhet të kenë gjithashtu një përgjegjësi të tillë, u theksua në diskutim. /tesheshi.com/
