Ish-trajneri i Kombëtares së Shqipërisë, Xhani de Biazi, do të jetë trajner i Alaveshit në kampionatin spanjoll.
Tekniku italian që u largua nga kuqezinjtë në qershor, do të vihet në krye të skuadrës që luan në kategorinë e parë, por që aktualisht ndodhet në vendin e fundit të La Liga-s.
Vetë De Biazi e ka konfirmuar arritjen e marrëveshjes, e cila e çon për herë të dytë në Spanjë, pas eksperiencës së pak viteve më parë tek Levante.
Klubi spanjoll me sa duket ka pritshmëri tek ish trajneri i Shqipërisë, pasi Alavesh nuk ka asnjë pikë dhe për më tepër, këtë fundjavë do të luajë kundër Realit të Madridit, që ka lënë shumë pikë gjatë këtyre javëve e supozohet se nuk do të tolerojë asgjë.
Në krye të pankinës shqiptare, De Biazi shënoi një rekord historik, pasi bëri të mundur që kombëtarja kuqezi, për herë të parë të kualifikohet në Kampionatin Europian. /tesheshi.com/
