Nga Ylli Pata
Pas një hezitimi prej 7 vitesh, Ilir Meta është futur në rrjetet sociale. Edhe pse në moshë është nga më të rinjtë e politikës së Tiranës, Meta ka bashkkohës vetëm Sali Berishën në vitet e politikës aktive.
Ky status “veteran” i dha ish-kryetarit të LSI-së një staturë politike klasike që në fakt i doli mjaft e suksesshme në komunikimin publik. Në opinion është e palëvizshme aksioma e kthyer në legjendë urbane se Ilir Meta nuk ka “fjalë shumë”, por “nëse ta jep fjalën e mban”.
Ky lloj “qyrku” politik i vleu më shumë Ilir Metës sesa komunikimi me rrjete sociale, duke qenë se target-grupi që ai synonte ta bënte për vete ishte specifik dhe kollaj i kapshëm me metodat klasike të komunikimit.
Në kulmin e “trendit” për rrjetet sociale në vitet 2010-2011, kur Edi Rama dhe Sali Berisha ziheshin me njëri-tjetrin se kush është më i mire, Twitteri apo Facebook-u, në media ironozohej LSI-ja e cila kishte “ndërtuar” sallën e Facebook-ut në katin katërt.
Por duket se Meta nuk ka rezistuar dot dhe sapo është futur në selinë e Presidencës ka ndryshuar mendim, duke ndërmarrë një operacion marketingu tepër të kujdeshshëm, me shfaqjen e një imazhi mjaft ndryshe nga ai që kemi parë në të shkuarën. Kjo dallohet qartë në fotot, por edhe mesazhet e qeta dhe të kuruara që publikohen në faqen zyrtare Ilir Meta në Facebook.
Është një faqe që sponsorizohet vazhdimisht për të arritur shikueshmëri maksimale. Dhe ndoshta është e nevojshme që të përdoren “shiringat dixhitale” për të kapur kohën e humbur të mospërfshirjes në rrjetet sociale.
Nuk është faqe tipike institucionale; jo, dalohet edhe në konfigurimin e saj nëse e krahason me faqet homologe të presidentëve të vendeve të tjera. Kjo shikohet si nga emërtimi ashtu edhe nga konfigurimi.
Në Francë, përshembull, Pallati Elyse, që është selia e kreut të shtetit ka një faqe të veten në Facebook ku pasqyron aktivitetin e Presidentit të Republikës franceze. Ndërsa Emanuel Macron, Presidenti francez pra, ka një faqe të tijën ku e përdor për të komunikuar politikisht me zgjedhësit e vendit të tij. Pra një faqe institucionale dhe një personale.
Ndërkaq, modeli që ka zgjedhur Ilir Meta i ngjan Donald Trump, i cili në Twitter ka të njëjtën adresë si të tijën e si të Shtëpisë së Bardhë. Ndërkohë që Obama kishte një në emrin e tij, e një POTUS(President of United States”.
Presidenti Ilir Meta po krijon një imazh të ndjeshëm në lidhje me shtresa të veçanta të shoqërisë, ku është fokusuar me shumë vëmendje. Që nga nisja e aktivitetit të tij, Presidenti ka regjistruar dhjetëra e dhjetëra takime për jetimët dhe shtresa të tjera në nevojë, ku madje ka dekoruar edhe pjesëtarë të njohur të këtij komuniteti.
Në fotot që shpërndan shpesh në faqe, Ilir Meta duket në shoqërinë e VIP-ave të sho
wbis-it që janë mjaft popullorë në vend, si Bes Kallaku i Portokallisë, e shoqja Xhensila, apo edhe Ermal Mamaqi.
Duket se ky imazh i Ilir Metës, që nisi të shfaqej që në dasmën e Bes Kallakut, ku u tund e u shkund pa asnjë kompleks presidenti që kurrë nuk ishte parë, ka një qëllim më shumë sesa pasqyrimi i lajmeve presidenciale.
Ilir Meta, duket po punon për krijimin e një profili të ri politik të tij, me një lloj “operacioni plastik” virtual që të japë një imazh më trendi dhe në përputhje më kohën.
Por ajo që është më e rëndësishmja, një imazh që nuk synon thjesht ata mbështetës që ka pasur gjithmonë, por një grup interesi të ri dhe që nuk e njeh shumë.
Meta nuk e ka për herë të parë ndryshimin e imazhit të tij fizik dhe politik. Katër vjet më parë, të gjithë u habitën kur e panë ashtu të dobësuar politikanin topolak dhe të bëshëm që ngjante me një shtangist(që në fakt edhe ka qenë).
Bashkë me dobësimin që ishte kryer në grup në LSI, pasi edhe Petrit Vasili e Agron Çela ndoqën kurën e Metës, ai solli edhe një fjalor të butë e të shtruar, si dhe formulën e famshme “qetësi e dashuri”.
Një ndryshim imazhi që ka kryer edhe bashkëshortja e Metës që tani ka marrë frenat e LSI-së. Monika Kryemadhi ka ndryshuar totalisht pamjen e saj fizike, gjë që komentohet shpesh në media. Ky ndryshim i shpeshtë i imazhit të Ilir Metës deri tani ka funksionuar tek një pjesë e opinionit publik, por jo tek të gjithë.
Ndërkohë që do të shikohet gjatë vitit të ardhshëm se sa do të jetë efikas ky “operacion i ri” imazhi i Presidentit të Republikës, i cili në rrjetet sociale ka hyrë si politikan dhe jo si institucion. /tesheshi.com/
