Nga Ermir Hoxha
Diplomati gjerman në krye të Prezencës së OSBE-së, ashtu siç ishte paralajmëruar edhe në këtë faqe, do të shpërthente një çështje të rëndësishme sapo të mbërrinte në Tiranë. Dhe kjo ka ndodhur dje kur ambasadori Bernd Borchardt, ka kërkuar që të hapen urgjentisht dosjet e Sigurimit të Shtetit, që është një proces tashmë i përfunduar në çdo hap por që është mbajtur “in hold” nga ana e kryeministrit Edi Rama.
Burime diplomatike bënë të ditur se procesi i hapjes së dosjeve është bërë gati plotësisht, por aleati kryesor i PS-së, LSI-ja, ka kundërshtuar prezencën si kryetare e komisionit të dosjeve të një zyrtareje të lartë e qeverisë, që është dhe njeri i besuar i Edi Ramës.
Ka qenë vetë Meta që ka kërkuar largimin e saj, por që në fakt juridikisht nuk është bërë ende.
Mësohet se në misionin e hapjes së dosjeve dhe verifikimit të tyre, proces që është bërë me ndihmën e Gjermanisë, janë arritur të shikohen edhe dosjet e kundërspiunazhit, që pritet të shkaktojnë një “efekt-tërmet” në politikën shqiptare.
Ambasadori i OSBE-së, Borchardt në mënyrë të hapur ka sulmuar kreun e Kuvendit që është edhe shkaktari i kësaj vonese.
“Pavarësisht se Kuvendit i është dërguar një listë me 11 kandidatë potencialë për 5 anëtarët e këtij Autoriteti, Kuvendi ende nuk ka votuar për kandidatët. E përshëndetëm hovin që u duk se do të shoqëronte zbatimin e këtij ligji dhe dëshirojmë të shohim personat përgjegjës të marrin masat e nevojshme për ta kthyer në axhendën e parlamentit, për të mundësuar zbatimin e ligjit dhe hapjen e dosjeve në përputhje me ligjin”, u shpreh Borchardt.
Ambasadori i OSBE-së tha se përvoja e vendeve të tjera që janë përballur me të shkuarën, tregon se vetëm përmes zbulimit, trajtimit dhe diskutimit rreth padrejtësive të shkuara, arrijmë të mos lejojmë atë të bëhet barrë për të ardhmen.
Ambasadori gjerman iu referua eksperiencës së vendit të tij, në përballjen me dosjet e regjimit komunist pas vitit 1990.
“Është pranuar gjerësisht se zbulimi i këtyre dosjeve me një administrim të kujdesshëm ka qenë një hap integral i Gjermanisë në përballjen me të kaluarën e vet dhe, pavarësisht se shkaktoi disa skandale mediatike, procesi nuk shkaktoi asnjë trazirë sociale.
Në këndvështrimin tonë, që Shqipëria të përballet me sukses me të kaluarën, është thelbësisht e rëndësishme që ligji për hapjen e dosjeve të Sigurimit të zbatohet me efektivitet dhe të shoqërohet me dialog përfshirës për të zbutur tensionet që mund të lindin nga publikimi i këtyre dokumenteve”, deklaroi Borchardt. /tesheshi.com/
