Të dy duket se shkojnë mirë bashkë: kryeministrja italiane Meloni dhe miliarderi amerikan Musk. Por kjo miqësi mund të bëhet problem.
“Këta gjyqtarë duhet të largohen” – janë vetëm disa fjalë që Elon Musk shkroi në X, platformën e mesazheve të shkurtra që ai zotëron. Por këto fjalë kanë peshë: Musk në këtë mënyrë ndërhyri në konfliktin midis qeverisë italiane dhe gjyqësorit italian mbi çështjen shumë të diskutueshme nëse Italia mund të përpunojë kërkesat për azil në Shqipëri.
Deklarata e Musk i ka pëlqyer kreut të partisë Lega, Matteo Salvini, ndërsa presidenti i vendit Sergio Mattarella nuk është shprehur entuziast. “Italia është një demokraci e madhe dhe mund të kujdeset vetë për veten,” komentoi Mattarella.
“Ai që do të marrë një rol të rëndësishëm në qeverisjen e një vendi mik dhe aleat duhet të respektojë sovranitetin italian dhe nuk mund ta bëjë detyrë të japë udhëzime për shtetin”, theksoi presidenti italian.
Një goditje e qartë në drejtim të Musk, i cili në SHBA duhet të ketë një rol në qeverinë e Donald Trump. Çfarë bie në sy në të gjithë diskutimin: kryeministrja Giorgia Meloni hesht. Ajo e vlerëson shumë Musk. Pak ditë më parë Meloni tha se beson se ai ka shumë vlerë pikërisht në këto kohë, sepse ka bërë gjëra të jashtëzakonshme dhe të rëndësishme. “Musk mund të jetë një bashkëbisedues, një person me të cilin mund të shkëmbehen mendime”, theksoi kryeministrja italiane.
Ata supozohet se janë miq. Musk ka vizituar disa herë Melonin në Romë dhe rreth një vit më parë ai ishte folës në Atreju, një festival rinor italian i krahut të djathtë i themeluar nga Meloni. Kur Meloni mori çmimin Global Citizen në Nju Jork, ajo zgjodhi Elon Musk për t’i dhënë asaj çmimin.
Ai ishte aq i mahnitur me të atëherë sa që tabloidët filluan menjëherë të spekulonin për marrëdhënien e tyre. Ishte një nder për të që t’i jepte një çmim një gruaje, “bukuria e brendshme e së cilës është edhe më e madhe se bukuria e jashtme”, tha Musk në atë kohë. Ai gjithashtu shtoi: “Unë e admiroj Giorgia Melonin”.
Miqësia politike Musk dhe Meloni?
Por çfarë do të thotë kjo miqësi për Italinë? A ndajnë Meloni dhe Musk ide politike? Piero Ignazi, profesor i shkencave politike në Universitetin e Bolonjës, nuk beson se Musk ka shumë ide politike.
“Ai është thjesht një sipërmarrës jashtëzakonisht i suksesshëm me disa ide dhe intuitë të shkëlqyer, i cili në një moment vendosi të mbështesë Trump,” thotë Ignazi. Para kësaj, Musk mbështeti demokratët.
Por një gjë është e qartë: “Musk ka ide për Italinë. Më saktësisht, ide se si kompanitë e tij mund të bëjnë biznes me Italinë. Thashethemet thonë se Musk planifikon të ndërtojë një fabrikë të madhe Tesla në Itali nëse qeveria i jep atij lehtësira tatimore.”
Përveç kësaj, ai do të donte të siguronte pjesët e Italisë pa një lidhje të mirë interneti me internetin përmes satelitëve të tij Starlink. Dhe Italia gjithashtu mund të përdorë satelitët për qëllime ushtarake. Por politologu Ignazi e konsideron të padëshirueshme këtë, duke aarsyetuar se Italia do t’i jepte shumë pushtet një personi privat.
Meloni dhe kontakti i saj i drejtpërdrejtë me qeverinë amerikane
Musk së shpejti duhet ta bëjë më efikase qeverinë e Trump, siç paralajmëroi presidenti i sapozgjedhur amerikan. Kështu, kjo miqësi mes miliarderit dhe kryeministres Meloni mund të bëhet e rëndësishme për marrëdhëniet mes SHBA-së dhe Italisë.
Për politologun Ignazio, marrëdhënia mes Musk dhe Melonit është një thikë me dy tehe. “Nga njëra anë, mund të jetë një avantazh i madh për kryeministren. Falë marrëdhënies së tyre të veçantë, ajo mund të hyjë në kontakt të drejtpërdrejtë me Musk ose të ndikojë në proceset me të cilat ai merret”, thotë Ignazi.
“Nga ana tjetër, situata mund të bëhet e pakëndshme. Sepse nëse, për shembull, do të kishte një luftë tregtare midis BE-së dhe SHBA-së, të cilën disa ekspertë e parashikojnë, miqësia e Melonit me Musk mund të bëhet problem”, thotë Ignazi, shkruan Deutsche Welle. /tesheshi.com/
