Kryeministri Kurti i kushtuar një status takimit që pati një ditë më parë me hoxhën e njohur prishtinali Hysamedin Abazi, duke vizituar me të një qendër sociale komunitare, si dhe duke marrë prej tij një dhuratë intelektualo-patriotike.
“Në muret e fondacionit humanitar ‘Freskia’ në Prishtinë, gjendet mbishkrimi ‘Mos më ushqe me peshk, por ma mëso peshkimin’.
Ky fondacion ofron trajnime dhe kurse për nëna vetushqyese të cilat aftësohen për tregun e punës. Pastiçeria dhe rrobaqepësia janë dy nga sektorët e aftësimit, e të hyrat nga shitjet mbesin në dobi të nënave vetushqyese.
Gjatë vizitës në këtë fondacion, pata kënaqësinë të takoja edhe hoxhë Husamedin Abazin me të cilin patëm diskutime të përzemërta. Ai gjithashtu më dhuroi kompletin e librave të Sami Frashërit të botuara nga Logos-A”, shkruan Kurti.
Sa i përket kësaj të fundit, kujtojmë se hoxhë Hysamedin Abazi është njëherësh dhe kryeredaktor i Logos-A, shtëpia botuese më prestigjoze në Maqedoni. /tesheshi.com/
