Braktisja e fëmijëve shqiptarë në vende të huaja duket se po kthehet në një fenomen shqetësues.
Pak ditë më parë mediat italiane dhanë alarmin se fëmijë shqiptarë udhëtonin nga Tirana drejt Italisë, duke shfrytëzuar udhëtime turitike dhe më pas kërkonin azil, duke pohuar se ishin pa përkrahje, ndërsa ligjet detyrojnë institucionet e shtetit të kujdesen.
Duket se për të minimizuar apo parandaluar një fenomen të tillë, Avokati i Popullit propozon marrjen e masave që do të çojnë në uljen e varfërisë së skajshme, pabarazisë shoqërore dhe mungesës së theksuar të vëmendjes shtetërore për fëmijët dhe shtresat e tjera vulnerabël në vend.
Institucioni i Avokatit të Popullit, vëren se ato që nuk po funksionojnë, janë mekanizmat lokalë për adresimin e çështjeje komplekse e mbi të gjitha për parandalimin e këtij fenomeni, si dhe për rikthimin e sigurt dhe të mbështetur të fëmijëve pranë familjeve të tyre.
Zgjidhja më e mirë e problematikës është vetëm zgjidhja e çështjeve në burimin e tyre ndaj edhe qeveria shqiptare duhet ta shohë këtë zgjidhje me përparësi e t’i përkushtojnë asaj të gjitha mjetet e duhura.
Avokati i Popullit është i mendimit se autoriteteve tona qendrore u takon përgjegjësia jo vetëm për mbrojtjen e fëmijëve, por edhe për të shtuar dhe zhvilluar mjetet për përmirësimin e pozicionit të fëmijëve në shoqëri, arsim, kujdes social dhe dalje nga varfëria.
Avokati i Popullit nënvizon se është thelbësore që institucionet tona të tregojnë:
Kujdes dhe mbrojtje ndaj fëmijëve, siç parashikohet në Konventën për të Drejtat e Fëmijës.
Standarte më të larta të shendetit dhe aksesin në shërbimet e kujdesit shëndetësor.
Të drejtën për arsimim falas dhe të mundësueshëm për të gjithë fëmijët.
Asistencë të veçantë për prindërit dhe kujdestarët ligjorë në ushtrimin e përgjegjësive të tyre për mirërritjen e fëmijëve. /tesheshi.com/
