Ansambli i baletit të Teatrit Bolshoi të Moskës po udhëton për në Pekin, si pjesë e turneut të tij të parë ndërkombëtar pas pandemisë, i cili këtë herë nuk do ta çojë në Perëndim, sepse atje nuk është i mirëpritur për shkak të pushtimit rus të Ukrainës.
Balerinat dhe balerinët shpresojnë se kjo do të lajmërojë kthimin në skenën botërore të xhevahirit të kurorës së kulturës ruse, e cila bëri xhiron e botës edhe në ditët më të tensionuara të Luftës së Ftohtë, raporton Reuters.
“Nuk është sekret se Kina është një nga vendet e pakta që na mbështet dhe vazhdon të bashkëpunojë me ne”, tha për agjencinë britanike Mahar Vaziyev, drejtori artistik i baletit. “Unë besoj se ne do të performojmë përsëri (në Perëndim) dhe të tjerët do të vijnë në (Rusi) për të performuar. Është e nevojshme dhe e paçmueshme”.
Teatri Bolshoi, i themeluar në 1776 nga Perandoresha Katerina e Madhe, do të prezantojë fragmente nga disa prej veprave të tij më të famshme të baletit në dy shfaqje gala në Pekin, të ndjekura nga tre ditë shfaqje të baletit Don Kishoti. Pothuajse 300 kostume dhe i gjithë peizazhi tashmë janë dërguar në Kinë.
“Jam shumë i kënaqur që më në fund do të kemi një paraqitje mysafire jashtë vendit. Ne e presim me padurim”, tha prima balerina Elizaveta Kokorjeva për Reuters mes provave.
Në shkurt të vitit të kaluar, një ditë pasi Moska dërgoi trupa në Ukrainë, Shtëpia e Operës Mbretërore e Londrës anuloi kthimin e planifikuar të Teatrit Bolshoi pas pandemisë. Anulimet pasuan në qytete të tjera perëndimore.
Vladimir Urin, drejtori i Teatrit Bolshoi, tha se ishte i pikëlluar nga humbja e bashkëpunimit të mëparshëm të rregullt krijues me kompanitë dhe artistët e teatrit perëndimor.
Pas Kinës, baleti më i famshëm rus do të udhëtojë në kryeqytetin e Bjellorusisë, Minsk, shfaqje e planifikuar në nëntor dhe në Oman në fillim të vitit të ardhshëm. /tesheshi.com/
