Nga Blendi Gashi
Bojkoti që i bëri sot Lista Serbe presidentit Hashim Thaçi është një sinjal tejet i qartë se Kadri Veseli dhe Ramush Haradinaj nuk do ta kenë aspak të lehtë ta bindin këtë parti të minoritetit serb që t’ia marrin votat për qeverinë e re edhe pse e konsiderojnë si fakt të kryer.
Kjo parti e cila ka bërë të ditur se çdo vendim të saj do e marrë në përputhje me Beogradin, me bojkotin e sotëm paralajmëron jo vetëm koalicionin PDK-AAK-NISMA-n, por edhe çdo parti tjetër se nuk bëhet pjesë e ekzekutivit të ri pa ju plotësuar kushtet që kanë, e kryeprioriteti i saj është themelimi i Asociacionit të Komunave me shumicë serbe apo “Zajednicës”, gjë që e tha ditë më parë edhe zëdhënësi i “Srpska”-s Igor Simiç.
Duke parë aktualisht pamundësinë e një koalicioni të gjërë mes partive shqiptare, rreziku që të bëhen favore me partinë që tashmë drejtohet nga Goran Rakiq (kryetar aktual i Mitrovicës së veriut) vetëm që të krijohet qeveria janë mëse reale.
Njohësit e rrethanave politike thonë se Lista Serbe në asnjë mënyrë nuk do të bëhet pjesë e qeverisë së re nëse nuk marrin atë që dëshirojnë. Andaj sipas tyre zgjidhja më e mirë është që subjektet shqiptare t’i lënë asnash inatetet dhe të bashkëqeverisin në mënyrë që institucionet të mos jenë në duar të Beogradit.
Politologu Mentor Tahiri, thotë se Lista Serbe ka bojkotuar Thaçin pasi takimet e tilla nuk i sheh serioze dhe po analizon me vëmendje zhvillimet politike që më pas të përfitojë.
Tahiri më tej shprehet se edhe vet kryetari i kësaj partie ka pohuar se do të jetë aktiv në konsultime me subjektet tjera, vetëm pasi që të bëhet i ditur emri i mandatarit për formimin e qeverisë.
“Mandatimi i përfaqësuesit të koalicionit PAN për formimin e qeverisë i konvenon më së shumti Listës Serbe, ngase në një konotacion të tillë numerik, do të vijnë në shprehje kushtëzimet e saj politike, gjë që nuk do të ndodhë në rast se krijohet një shumicë parlamentare ku votat e saj.
Pritet veç tjerash edhe një angazhim në formë presioni i Beogradit zyrtar, për të krijuar në mesin e qarqeve të caktuara ndërkombëtare, një lloj simpatie për një shumicë parlamentare ku votat e Listës Srpska do të ishin vendimtare”, thotë Tahiri për tesheshi.com.
Seb Bytyqi, ligjëruesi i shkencave politike në Universitetin e Uinçesterit në Angli, parasheh kompromise të dhimbshme nëse qeveria e re do varet nga votat e Listës Serbe.
“Qeveria në ikje u themelua nga PDK dhe LDK që kishin mbi 61 deputetë së bashku dhe Lista Serbe i detyroi ta nënshkruajnë një marrëveshje koalicioni për t’u futur në qeveri. Në rast se qeveria e re varet nga votat e kësaj liste, atëherë do t’i detyrojë partnerët të nënshkruajnë një marrëveshje koalicioni. Aty mund të pritet që premtimi kryesor është themelimi i shpejtë i Asociacionit/Bashkësisë së komunave serbe. Gjithashtu mund të priten edhe kompromise të reja që kamë të bëjnë me nivelin qendror por edhe me atë lokal ku nuk duhet të përjashtohet edhe krijimi i ndonjë komune të re me shumicë serbe”, thotë Bytyqi për tesheshi.com.
Faik Krasniqi, njohës i rrethanave politike thotë se Lista Serbe ka thënë se pa ju përmbushur kërkesat nuk e voton qeverinë e re, andaj edhe mospjesëmarrja në takim te Thaçi tregon qartëse ata janë të palëkundur në qëndrimet e tyre.
“Lista Serbe prej fillimit ka deklaruar që nuk do u japin votat për formimin e qeverisë nëse nuk ju plotësojnë kushtet e tyre. Një ndër ato kushte të serbëve ishte krijimi i shpejt i Asociacionit të komunave me shumicë serbe. Dhe një ndër kushtet e tyre që do i bëjnë koalicionit PAN, në shkëmbim të votës për krijimin e Qeverisë, do të jetë edhe posti i kryeparlamentarit dhe zv-drejtorit të AKI-së. Prandaj, është e rëndësishme që qeveria të krijohet me shumicë shqiptare, në mënyrë që që mos të lihet vendi në duart e Listës Serbe”, thotë Krasniqi për tesheshi.com.
/tesheshi.com/
