Prodhuesi gjerman i vaksinave BioNTech pret të lançojë vaksinën e tij të personalizuar për COVID-19 në shtator, njoftoi kompania gjatë njoftimit të humbjeve financiare të tremujorit të dytë.
Dorëzimi i vaksinës së përshtatur me variantin XBB.1.5 të virusit korona, nënvarianti omikron, duhet të fillojë muajin e ardhshëm.
Biznesi i reduktuar ndjeshëm me vaksinat e COVID-19 ka vënë një presion të madh në bilancin e kompanisë me bazë në Mainz dhe gjithashtu partnerit të saj amerikan Pfizer.
Shitjet e BioNTech të vaksinës kundër COVID 19 në gjysmën e parë të vitit ranë në 1.4 miliardë euro, krahasuar me 9.57 miliardë euro në të njëjtën periudhë të vitit të kaluar. Fitimi i kompanisë ra në 311.8 milionë euro, nga 5.37 miliardë euro në të njëjtën periudhë të vitit të kaluar.
Humbje e regjistruar
Në tremujorin e dytë, i cili përfundoi në fund të qershorit, shënoi një humbje prej 190.4 milionë euro, krahasuar me një fitim prej 1.67 miliardë eurosh në të njëjtin tremujor të një viti më parë. Të hyrat tremujore arritën në 167.7 milionë euro, pas 3.2 miliardë eurove në të njëjtën periudhë të vitit të kaluar.
BioNTech ka mbajtur të pandryshuar parashikimin e saj për të gjithë vitin dhe pret shitjet e vaksinës kundër COVID-19 me vlerë rreth pesë miliardë euro.
Kompania vuri në dukje se disa pagesa u morën pas përfundimit të tremujorit të dytë, duke përfshirë kompensimin nga Pfizer prej rreth 1.06 miliardë eurosh për pjesën e BioNTech në fitimin bruto për tremujorin e parë të 2023. /tesheshi.com/
