Presidenti amerikan Joe Biden dhe kryeministrja italiane Giorgia Meloni thanë në një deklaratë të përbashkët pas takimit në Shtëpinë e Bardhë se “Shtetet e Bashkuara të Amerikës dhe Italia riafirmojnë angazhimin e tyre të përbashkët për sigurinë, stabilitetin dhe prosperitetin e Ballkanit Perëndimor dhe mbështetje të qëndrueshme për integrimin euroatlantik të rajonit”.
Ata thuhet gjithashtu se kanë vendosur të forcojnë koordinimin në mënyrë që të favorizojnë de-përshkallëzimin dhe pajtimin dhe kanë pranuar rolin kyç të Quinti-t, në rastin e Kosovës.
Në deklaratë thuhet gjithashtu se Shtetet e Bashkuara mirëpresin angazhimin e qeverisë italiane në Ballkanin Perëndimor, duke përfshirë kontributin e forcave të armatosura italiane në misionet KFOR, EULEX dhe EUFOR Althea.
Presidenti amerikan Joe Biden dhe kryeministrja italian Giorgia Meloni njoftuan pas takimit të tyre të enjten forcimin e lidhjeve ekonomike dhe bashkëpunimin në zgjidhjen e sfidave të paraqitura nga Kina, ndërsa dallimet për të drejtat e personave LGBT u lanë mënjanë, shkruan Reuters.
Pozicioni i kryeministres italiane dhe koalicionit të partive të krahut të djathtë që ajo drejton për abortin dhe të drejtat LGBT është në kontrast të plotë me pozicionin e Joe Biden, një demokrat që theksoi rezultatet e zgjedhjeve italiane të vitit të kaluar si një paralajmërim për liberalët për rreziqet përballë demokracive në mbarë botën.
Megjithatë, Biden tha se ai dhe Meloni janë bërë miq, ndërsa Meloni u kundërpërgjigj se ajo dëshiron të ketë një marrëdhënie të shkëlqyer me Biden, edhe pse është e qartë se ajo preferon Partinë Republikane.
Një mundësi për të konfirmuar një partneritet të fortë
Të dy liderët diskutuan pjesëmarrjen e Italisë në nismën e Kinës “Belt and Road”, por Uashingtoni nuk ka ndërmend të diktojë politikën e Italisë ndaj Kinës, tha kryeministrja italiane.
“Marrëdhëniet tona janë të forta dhe mbeten të forta pavarësisht nga ngjyrat politike. E dimë kush janë miqtë tanë në kohë të vështira”, tha Meloni në fillim të takimit në Zyrën Ovale.
Meloni e shfrytëzoi qëndrimin e saj në kryeqytetin amerikan edhe për të vizituar Kongresin, ku u takua me kryetarin e Dhomës së Përfaqësuesve, republikanin Kevin McCarthy.
Si Roma ashtu edhe Uashingtoni shohin në takimin mes Bidenit dhe Melonit një mundësi për të konfirmuar partneritetin e fortë midis dy vendeve, pasi që të dyja qëndrojnë pas ndihmave miliarda dollarëshe, ushtarake dhe të tjera, që vendet perëndimore i kanë ofruar Ukrainës në mes të luftës me Rusinë.
Rënë dakord për vazhdimin e ndihmës për Ukrainën
Biden vlerësoi Italinë për qëndrimin e saj të vendosur ndaj Ukrainës dhe Meloni theksoi se ishte krenare sepse vendi që ajo drejtoi ndihmoi në mbrojtjen e ligjit ndërkombëtar.
Uashingtoni shpreson se një aleancë perëndimore kundër pushtimit rus të Ukrainës do ta pengojë Kinën nga përpjekjet për të ndryshuar status quo-në në Tajvan, të cilin e konsideron territorin e saj.
Në një deklaratë të përbashkët pas takimit, të dy udhëheqësit u zotuan të vazhdojnë të ndihmojnë Ukrainën për aq kohë sa të jetë e nevojshme dhe të krijojnë një dialog më të mirë mbi “mundësitë dhe sfidat e paraqitura nga Republika Popullore e Kinës”.
Në vitin 2019, Italia u bë e para dhe deri tani e vetmja anëtare e grupit G7 që iu bashkua Iniciativës “Brez dhe Rrugë” e cila u shoqërua me kritika dhe frikë se hyrja në një marrëveshje të tillë do t’i jepte Kinës kontroll mbi infrastrukturën kryesore dhe proceset teknologjike.
Në maj të këtij viti, Meloni deklaroi se është e mundur të kemi marrëdhënie të mira me Pekinin edhe pa anëtarësim në programin e përmendur kinez, gjë që u interpretua si një njoftim për dalje nga ai pas marsit të vitit të ardhshëm. /tesheshi.com/
