Rrjeti social Twitter, i ekspozuar ndaj kërcënimeve serioze të sigurisë, ka punësuar një nga hakerat më të famshëm në botë për të zgjidhur problemet, nga gabimet inxhinierike deri në përhapjen e dezinformatave.
Kompania emëroi Peiter Zatko, i njohur zakonisht me emrin e ë hakerit Mudge, në pozicionin e shefit të sigurisë dhe i dha atij kompetenca të gjera për të rekomanduar ndryshime në strukturë dhe praktika. Zatko do të raportojë tek CEO i Twitter-it Jack Dorsey dhe pritet të marrë menaxhimin pas një analize që do të zgjasë 45 deri në 60 ditë, raportojnë agjencitë.
Zatko njoftoi se ai do të shqyrtojë “sigurinë e informacionit, integritetin e faqeve të rrjetit, sigurinë fizike, integritetin e platformës dhe pjesës inxhinierike”.
Biografia e gjallë e Zatkos filloi në vitet 1990 kur ai njëkohësisht drejtoi një biznes konfidencial për një kompani që kishte një kontratë me qeverinë dhe ishte udhëheqësi i “Kultit të Lopës së Vdekur”, një grup hakerash të famshëm për lëshimin e mjeteve të hakimit të Windows për të bërë që Microsoft të përmirësonte sigurinë.
Gjatë karrierës së tij, Zatko, ndër të tjera, punoi në projekte speciale të Google dhe mbikëqyri shpërndarjen e projekteve të sigurisë kibernetike në Agjencinë e Avancuar të Projekteve të Pentagonit (DARPA). /tesheshi.com/
