Kryetari i Akademisë se Shkencave dhe Arteve të Serbisë, institucionit që në shekuj ka përgatitur strategjitë e veprimit për qeveritë e Beogradit, ka hedhur “bombën” në mes të kryeqytetit serb.
Kryeeakademiku Dr. Vladimir Kostiq tha në një intervistë në radion publike të Serbisë se Kosova tashmë nuk është as de jure e as de fakto në duart e Serbisë, ndaj krerët politikë duhet t’ia thonë popullit këtë gjë.
Kostiq deklaroi edhe të tjera gjëra, si për shembull për Moskën, por kanë qenë deklaratat e tij për Kosovën që kanë shkaktuar një tërmet politik në vend që kanë sjellë edhe reagimin e ashpër të presidentit Nikoliq.
“Kam frikë se në këtë moment, e vetmja mençuri politike, është se në cilën mënyrë, me elemente të dinjitetit, të lihet (braktiset) Kosova, sepse as de fakto, as de jure nuk është në duart tona. Dhe këtë dikush duhet t’ia thotë popullit”, tha Kostiq në emisionin “Sedmica” (Java) të Radio Beogradit, thekson Tanjug.
“Për këtë duhet të luftohet me dhëmbë e me thonj, sepse kjo është përpjekje për të marrë diçka që është pjesë e historisë e psikologjisë tonë, por nëse një ministër, kryeministër ose president, duhet të kërkojë leje për të hyrë në këtë territor, kjo tregon shumë qartë se nuk kemi më as kapacitete njerëzore, as ekonomike, as çfarëdo kapacitetesh të tjera, që atje të imponojmë vullnetin tonë”, shtoi Kostiq.
Sipas tij, Kosova nënkupton numër të madh të asaj që paraqet bazën e kulturës serbe.
“Mund ta gënjejmë njëri-tjetrin duke e parë në sy, por alternativa është shumë e qartë. Nga ana tjetër, qëndrimi im ndaj BE-së është citati i Branko Miljinkoviqit – ‘Do të kthehem, unë e do të hyj në parajsë’, alternativë tjetër nuk ka”,tha Kostiq.
Ai mendon se aleanca me Rusinë është “alternative artificiale” dhe pyeti, “a e ka konsultuar dikush Rusinë, a e do Serbinë në përgjithësi”?
Kryetari i SANU, tha se atij i intereson shumë më tepër fati i Republikës Serpska, sepse atje ka një pjesë serioze, aktive, kulturore e shkencore prej 1 milionë e gjysëm – 2 milionë njerëz.
Pas kësaj deklarate kanë reaguar fort presidenti Nikoliq dhe ministri Vulin, që e kanë cilësuar si deklaratë personale dhe jo institucionale.
Kabineti i Presidentit ka reaguar gjatë me anë të një deklarate ku ka sulmuar fuqishëm kryeakademikun serb.
Në fakt kjo deklaratë i shkon shumë për shtat kryeministrit Vuçiç, i cili pritet të futet në zgjedhje dhe të marrë votën e elektoratit të moderuar serb.
Vuçiç pas vizitës në SHBA po tregon gjithnjë e më shumë një profil properëndimor.
Përgatiti: Ylli Pata – /tesheshi.com/
