Kryetari i Partisë Demokratike, Lulzim Basha, ka deklaruar sot, dy ditë para zgjedhjeve vendore të 21 qershorit se Kryeministri Edi Rama ka kërcënuar kandidatët e Partisë Demokratike të tërhiqen nga gara, pasi në të kundërt ata do ta pësojnë.
“Kërcënimi i kandidatëve është një risi tjetër e kësaj fushate. PD disponon të dhëna të pakundërshtueshme të kërcënimeve të Ramës ndaj kandidatëve të tërhiqen pasi do ta pësojnë. Për këtë kam të dhëna të pakontestueshme”,- tha Basha.
Në nisje të fjalës së tij, Basha përshëndeti deklaratën e Helsinkit, për të cilën tha se ngre lart shqetësimin që opozita dhe PD ka bërë prezent gjatë fushatës elektorale.
Sipas Bashës, përdorimi i administratës publike është bërë evident dhe është denoncuar me qindra raste. Ai shtoi se kërkohen 5-10 ose 15 votues nga punonjësit, në të kundërt humbin vendin e punës.
Për Bashën, një tjetër shqetësim është përfshirja masive e zyrtarëve të lartë të Policisë së Shtetit përkrah kandidatëve apo mosveprimi i tyre kur ka qenë e nevojshme.
“Kur Rama-Meta mbanin konferencën e tyre një orë më parë, bandat e Xhabatëve në Vorë kërcënuan kandidatin tonë. Të pranishëm janë edhe forcat e Policisë së Shtetit, të cilat kanë të gjitha kapacitetet, por nuk ndërhyjnë. Policia përdoret keq në mënyrë masive nga Rama. Ai ka vendosur Policinë e Shtetit në funksion të fushatës dhe u ka dhënë dorë të lirë banditëve që të kërcënojnë gjatë kësaj fushate”,- tha Basha.
Për të, përdorimi i policisë nuk është diçka e re për dyshen Rama-Meta. Sipas Lulzim Bashës, Forcat e Ndërhyrjes së Shpejtë të Fierit kanë terrorizuar aktivistë e PD në Mallakastër, pasi Meta nuk mund të pranojë humbjen në Mallakastër.
“Është po Meta që ka urdhëruar FNSH të bëjnë të njëjtën gjë në Bulqizë. Kemi vëzhguar në 10 buletine elektorale shkeljet e Policisë së Shtetit dhe incidentet ku policia nuk ka ndërhyrë për të vepruar sipas ligjit, siç është rasti i fundit, i djeshmi në Elbasan, ku ka persona që terrorizojnë aktivistët e PD-së dhe vijojnë të livadhisin nën hundën e policisë”,- deklaroi Basha.
Kreu i opozitës u shpreh se Edi Rama miraton me heshtjen e tij veprimet e Metës, edhe kur banditët kanë pantallonat e fryra, jo nga ndonjë gjë tjetër por nga kallashët e armët.
“Tritoli, përdorimi i armëve të zjarrit, prania e bandave dhe goditja e simpatizantëve tanë, kanë ngelur të gjitha pa autor pasi Policia e Shtetit është vënë në shërbim të bandave dhe bandat janë thirrur nga dyshja Rama-Meta për të kapur pushtetin vendor”,- ishin fjalët e liderit opozitar.
Ai shtoi se për Ramën e Metën këto nuk janë zgjedhje për pushtetin vendor e për qytetarët, pasi për ta ka rëndësi që në 21 qershor të kapin bregdetin, të konsolidojnë pushtetin dhe jo tu shërbejnë qytetarëve, ndaj kanë derdhur miliona në këtë fushatë, e nuk ka asnjë transparencë se nga vijnë këto para.
“Është një fushatë e çmendur sa i takon shpenzimeve, në këtë fushatë. Nuk duhet harruar presioni ndaj mediave. Rasti konkret i oktapodit Sejdini të Elbasanit. Po bëhet presion mafioz alla Putin ndaj medias së lirë. Sot Edi Rama dhe Ilir Meta nuk janë të sigurt për fitoren në asnjë bashki të vendit. Ata janë një pakicë që tkurren ndaj një shumice që rritet, ndaj qëllimi i tyre është shndërrimi i kësaj shumice në një shumicë pa gojë, pa vullnet”,- tha Basha.
Ai bëri me dije se mazhoranca do një Shqipëri që qeveriset alla putinçe dhe që i largohet standardeve Europiane, por nuk do t’ia dalin.
“Shqiptarët, të djathtë e të majtë kanë në krah PD-në dhe njerëzit tanë, të cilët do të jenë në krah të tyre më 21 qershor, kur do të vendoset të mos ia dorëzojmë pushtetin vendor bandave, oligarkisë”,- tha Basha.
Ai u bëri thirrje të gjithë qytetarëve të dalin e të votojnë më 21 qershor, me ço kusht e të mbrojnë votën e tyre./tesheshi.com/
