Lulzim Basha do t’i kërkojë Edi Ramës që të arrihet një kompromis për të ribërë edhe njëherë ndarjen territoriale të vendit, ku nga 61 bashki të bëhen 100 të tilla.
Top Channel citoi burime nga opozita, sipas të cilave në shtator do të vijë edhe kërkesa zyrtare për ta ndryshuar hartën aktuale.
Reforma Territoriale nuk është pjesë e marrëveshjes së 18 majit mes Edi Ramës dhe Lulzim Bashës, por në takimin e parë me grupin e ri parlamentar, kreu i opozitës e renditi si një nga çështjet kryesore të Partisë Demokratike me nisjen e legjislaturës së ardhshme.
Së shpejti në Partinë Demokratike do të ngrihet një grup pune që do të hartojë propozimet e opozitës për një ndarje të re territoriale, me më shumë se 61 bashki.
PD nuk e pranoi asnjëherë reformën e bërë nga qeveria “Rama” në mandatin e saj të parë, së bashku me LSI-në dhe PDIU-në. Në atë kohë, demokratët mbrojtën idenë se ndarja e re i shërbente rritjes së pushtetit politik të kryeministrit, largonte shërbimet nga qytetari dhe rriste kostot.
Në dëgjesën e sotme në Fier, kryeministri Rama pranoi defektet e funksionimit të ish-komunave, të kthyera në Njësi Administrative, në raport me shërbimin ndaj qytetarëve.
“Ajo që ka ndodhur është që, jo vetëm nuk e kemi ulur numrin e njerëzve që shërbejnë në pushtetin vendor, por përkundrazi, na është rritur edhe kosto financiare për shkak të një politike shumë të gabuar, në përgjithësi, punësimesh në shtet që nuk përkthehet në shërbime për njerëzit”, tha Rama.
Basha, i cili pritet të emërohet kryetari i komisionit për ndryshimet kushtetuese, pritet ta bëjë një kalë beteje edhe ndarjen e re administrative, duke ringjallur disa nga komunat, ku e djathta arrinte të fitonte. Sidomos në jug të vendit, duke krijuar pole pushteti.
/tesheshi.com/
