Federata Ndërkombëtare e Futbollit (FIFA) duhet ta ndalojë Izraelin të marrë pjesë në të gjitha aktivitetet e futbollit për shkak të luftës në Rripin e Gazës, sipas një analize të pavarur ligjore nga avokatë të specializuar në të drejtën ndërkombëtare dhe të drejtat e njeriut.
Në maj, Federata Palestineze e Futbollit (PFA) i kërkoi FIFA-s të pezullojë Izraelin “për shkak të gjenocidit që po kryen në Gaza”, dhe kjo kërkesë u mbështet nga Konfederata e Futbollit Aziatik (AFC). FIFA iu përgjigj kësaj kërkese duke kërkuar një vlerësim urgjent ligjor të situatës, duke premtuar se do t’i prezantohej publikut në një mbledhje të jashtëzakonshme të këshillit të saj në korrik, raporton Reuters.
“Nuk ka dyshim se sjellja e Izraelit në Palestinë minon të gjitha synimet e FIFA-s. Izraeli ka shkelur të drejtat e njeriut të njohura ndërkombëtarisht të palestinezëve, duke shkelur nenin 3. Ai diskriminon palestinezët në bazë të racës, kombësisë dhe lindjes, duke shkelur drejtpërdrejt nenin 4(1). Sjellja e tij minon objektivat humanitare të përshkruara në nenin 5.1(b).
Prandaj, sjellja e Izraelit kërkon pezullim, në përputhje me qëndrimin e miratuar nga FIFA në lidhje me shkelje të ngjashme të objektivave të saj dhe të drejtave të njeriut të njohura ndërkombëtarisht”, thuhet në vlerësimin e bërë nga avokatët Max du Plessis dhe Sarah Pudifin-Jones, dhe të punësuar nga organizata fitimprurëse për drejtësi sociale Eco.
Një sërë situatash të ngjashme deri tani
Eco shtoi se peticioni i tyre, i cili kërkon nga FIFA dhe Komiteti Olimpik Ndërkombëtar (IOC) përjashtimin e Izraelit nga garat ndërkombëtare sportive, ka mbledhur më shumë se 380,000 nënshkrime.
Presidenti i PFA-së, Jibril al-Rajoub, tha se pezullimi i Izraelit do të ishte në përputhje me vendimet e mëparshme të FIFA-s për pezullimin ose dëbimin e anëtarëve të saj që shkelën qëllimet e saj. Kështu, Afrika e Jugut u pezullua në vitin 1961 për shkak të zbatimit të aparteidit; Jugosllavisë iu ndalua të konkurronte në vitin 1992 për shkak të shkeljes së sanksioneve të OKB-së, dhe në vitin 2022, FIFA dhe UEFA reaguan menjëherë duke pezulluar Rusinë për shkak të agresionit kundër Ukrainës.
Më herët, PFA kërkoi pezullimin e Federatës së Futbollit të Izraelit (IFA) për shkak se qeveria izraelite shkel ligjin ndërkombëtar, por edhe për shkak të diskriminimit ndaj lojtarëve arabë. Dihet se edhe para fillimit të luftës në Gaza, disa klube izraelite refuzuan të angazhonin lojtarë nëse ishin arabë. /tesheshi.com/
