17-vjeçari Liam Derbyshire në Britaninë e Madhe vuan nga një sëmundje e rrallë, e quajtur sindromi i hipoventilimit qendror kongjenital. Kjo do të thotë se djaloshi duhet të lidhet me një aparaturë e cila ia mundëson atij që të marrë frymë, në mënyrë që të mund të mbetet gjallë.
Kur u lind Liam Derbyshire, mjekët prognozuan se ai nuk do të jetonte më shumë se gjashtë javë. Për disa muaj, ai do të mbushë 18 vjeç.
Nga sindromi i hipoventilimit qendror, në botë vuajnë 1.500 persona, një sëmundje që karakterizohet nga dalja jashtë funksionit e mushkërive gjatë gjumit.
Ajo gjithashtu shkakton sëmundje kardovaskulare dhe dëmtim të organeve tjera vitale, si truri.
“Kur të bjerë në gjumë, mungon aktivizimi i nervit frenik dhe truri nuk i tregon trupit tuaj se duhet të marrë frymë. Po të mos ekzistonte aparatura që drejton mushkëritë e tij gjatë gjumit, djali im nuk do të ishte gjallë”, shpjegon nëna e Liamit.
Për më keq, Liam gjithashtu ka humbur një pjesë të zorrës së trashë pas lindjes, dhe prej atëherë ai duhet të mbajë edhe qese kolostomie.
Gjendja e Liamit do të thotë se ai ka një rutinë shumë strikte gjatë gjumit.
Për këtë kujdeset babai Peter.
“Në qoftë se më pyesni nëse kam fjetur ndonjëherë si njeri, them se jo, për shkak se Liam ka lindur me shumë komplikacione shëndetësore. Por unë jam shumë krenar për të. Sikur të isha në vend të tij, prej kohësh do kisha hequr dorë nga jeta. Ne jemi vazhdimisht në gjendje gatishmërie dhe të merakosur se ndoshta kjo është hera e fundit që po i themi ‘natën e mirë’”, thotë Peter. /tesheshi.com/
