“Asdreni u mplak” është një poezi e panjohur e Asdrenit, e shkruajtur në vitin 1942, me nota satirike, kushtuar thashethemnajës, një fenomeni që përbën diskutim shoqëror në të gjithë kohërat.
Vjersha thumbuese është lënë në dorëshkrim prej poetit dhe i përket krijimtarisë së viteve të fundit të jetës së tij.
Nga kërkimet e bëra rezulton se vjersha “Asdreni u mplak” është pothuajse e panjohur për publikun, sikurse edhe disa dorëshkrime të tjera të poetit, që i përkasin periudhës së fillimviteve’40-të.
Kjo krijimtari ruhen në Arkivin Qendror të Shtetit, në fondin personal të Aleksandër Stavri Drenovës, në dosjen 22 me këtë përshkrim: “Poezi të ndryshme lirike, shkruar nga Aleksandër Stavri Drenova (të pabotuara) dorëshkrime dhe të daktilografuara”.
Përveç dorëshkrimeve të shumta në AQSH ruhen edhe një varg relikesh të vyera koleksionuar ndër vite nga Asdreni, i cili vijoi të shkruajë krijimtari poetike dhe të pasurojë koleksionin e tij të antikuarve deri në ditë te fundit të jetës, kur ju dha lamtumira e fundit me 1947 në Bukuresht.
Asdreni u mplak
Miqt’ e mij seç hynë në merak
Thonë se Asdreni na u mplak
Do të tjerë ca më t’ëmbël pak
Thonë Asdreni s’është akoma plak
Dhe disa më futin keq në lak
Kot, ç’do që të thuash, prap je plak
Flet bota pa fare ndonjë shkak
Pa shëko, Asdreni si u mplak
Ca më marrin ndënë vetull gjak
Thonë hiqu tej se qënke plak!
Me këto nuk tundem unë aspak
Kur po më thonë Asdreni u mplak
Por dhe unë që t’u vë kapak
Ndjej, u them, se s’jam akoma plak
Gjer më sot s’kam shkelur asajë prak
Që ta ndjej vërtet se qenkam plak
Kanë a s’kanë arsye sado pak
Para miqve mos të jem dredharak
Dhe që të mos bëhem qesharak
Më së fundi e pohoj: Jam plak!
Asdren, 1942
/tesheshi.com/
