“Topçinjtë” kanë dalë të fituar këtë pasdite në një ndeshje dramatike në “Emirates Stadium”. Ndaj Bërnlit nuk ka qenë aspak e lehtë, aq sa drejt fundit trepikëshi është dukur i pamundur.
I miri dhe i keqi! Shkodran Mustafi dhe Granit Xhaka kanë qenë në ekstremet e paraqitjes në fitoren 2-1 ndaj Bërnlit. Mustafi ka shënuar të parin gol të tij në kampionatin anglez. Në të kundërt, Xhaka ka marrë një karton të kuq krejt të panevojshëm, duke e lënë skuadrën me një lojtar më pak.
Goli i Mustafit është shënuar në minutën e 59-të, kur dhe Arsenali mori fillimisht kryesimin.
“Çfarë ndeshje! Tejet i lumtur për fitoren e minutës së fundit dhe për golin tim të parë për Arsenalin,” ka shkruar menjëherë në llogarinë e tij në Twitter Mustafi.
Përndryshe, kartoni i kuq i është nxjerrë Granit Xhakës në minutën e 65-të, pas një ndërhyrjeje krejt të
parregullt e të panevojshme.
Loja është kthyer në dramë kur miqtë kanë barazuar në minutën e 93-të me 11-metërsh. Gray do të ishte heroi i përkohshëm i Bërnlit. Ndëshkimi për udhëtuesit do të vinte në të njëjtën mënyrë pesë minuta më pas.
Alexis Sanchez është më me kurajë se ç’duhet. Minuta e 98-të, dhe ai nuk druhet ta ekzekutojë 11-metërshin në stilin Panenka.
Arsenali fiton 2-1 ndaj Bërnlit dhe ngjitet në vend të dytë në Premier League. /tesheshi.com/
